4-тӥ шуркынмонэ Кремльын Екатерининской залын Россиысь калыкъёслэсь огъя луэмзылэсь юнматонын тыршемзы понна Азьмуртлэсь кун данъетъёссэ но премиоссэ сётъязы. «Лудорвай» музей-заповедникысь тодосъёсъя секретарь Павел Орлов но «ОткрытиЯ» дышетон центрлэн кивалтӥсезлэн воштӥсез Анна Габдуллина Россиысь Азьмуртлэн премиезлэн лауреатъёсыз луизы. Соос кыкназы «Бадӟым этнографической диктант» югдытон ӵектослэн кылдытӥсьёсыз луо.

УЭ-ысь Йӧскалык политикая министерствоын ужаку Анна Габдуллина но Павел Орлов Калыкъёслэн Эшъяськон юртэнызы ӵош «Бадӟым этнографической диктант» акциез 2016-тӥ улонэ пыӵатыны кутскизы. Ӵектос Россиысь котькуд калыклэсь сям-йылолъёссэ, лулчеберетсэ, историзэ утьыны но вӧлмытыны, семья дунлыкъёсты юнматыны юрттэ. Со «Семья» йӧскалык ӵектослэн, кудзэ Владимир Путин юнматӥз, ужпумъёсызлы тупа.

10 ар ӵоже ӵектос калыккуспо луиз. Йӧскалык ужъёсъя Федерал агенство ӵектослы бадӟым юрттэт сётӥз, со ик акцилэн валтӥсь радъясез луэ. Туннэ нуналлы Удмуртиын кылдэм акцие Россиысь вань улосвылъёс пырисько, соос сяна кунсьӧр кунъёс но. Диктантэз ЛНР, ДНР, Херсон но Запорожск улосвылъёсын но радъяло.

«Та сямъёсты, та ог-огдэ гажанэз утьыны но нылпиосмылы сётыны – туж бадӟым ужпум. Солы ик «Бадӟым этнографической диктант» сӥземын. Отысь ми Россиысь пӧртэм калыкъёслэсь аспӧртэмлыкъёссэс тодӥськомы, озьы ик адӟиськомы, кӧня асьмелэн огкадез но. Туж пусйымон, диктантэз Калыкъёслэн огазеяськон нуналазы гожтӥськомы шуыса. Оскиськомы, котькудӥз, кин та нуналъёсы акцие пыриське, быгатоз валаны но шӧдыны валтӥсьсэ, кудӥз «Калыкъёсмы трос, нош кунмы одӥг!» мереткылын вӧлмытэмын», – пусйиз Анна Габдуллина.

Тодэ вайытом, туэ 1-тӥ шуркынмонэ Удмуртиын гинэ 214 площадка радъямын вал, валтӥсез соос пӧлын Йӧскалык лыдӟетъюрт луиз. Диктантэз онлайн амалэн но ортчыны быгатонлык луоз. 1-8-тӥ шуркынмонэ национальнаяполитика.рф вотэсбамын. Пыриськисьёслы йылпумъянъёсын сертификатъёс соку ик сётъязы.