19-21-тӥ инвожое Пензаын Россия Федерацилэн улосвылъёсаз кун йӧскалык политикаез улонэ пыӵатонъя дышетон семинар ортчиз.

Семинарез радъязы Йӧскалык ужъёсъя федерал агентство но Москваысь М.В. Ломоносов нимо кун университет.

Семинар таӵе темаослы сӥземын вал: Россиын йӧскалык кусыпъёс: пуктэм ужпумъёс но кыӵе соос луыны быгато азьланяз; йӧслыкез кылдытон туала концепциос; кун йӧскалык политикалэсь валтӥсь ӧръёссэ радъясь стратеги ужкагазъёслэн пуштроссы; йӧскалык политикаез улонэ пыӵатонын пӧртэм уровеньысь тӧрлык ёзэтъёслэн кусып воземзы; экстремизмлы профилактика, йӧскалык но конфесси кусыпъёсты педласянь куашкатыны турттонлэсь утён; кризисъёсын кивалтон но медиация, ивор вӧлмытон ёзэсъёсын но мер вотэсбамъёсын кризисной югдуръёсын ужан амалъёс; йӧскалыккуспо керетонъёсты дырыз дыръя палэнтон но сэрттон-пертчон; йӧскалык но конфесси кусыпъёслэсь историзэс тодын возён; кунлэн но мерлыклэн одӥг кылысь ужамзы но йӧскалык политикаез улонэ пыӵатон удысын граждан обществолэн институтъёсыз.

УЭ-ысь йӧскалык политикая министрлэн воштӥсез Александр Филатов но Калыкъёслэн Эшъяськон юртсылэн директорезлэн воштӥсез Алина Чернова кунгожсьӧр гражданъёсты адаптировать но интегрировать каронлы сӥзем ӵектосэн тодматӥзы. Москваысь М.В. Ломоносов нимо кун университетын но Приволжск федерал округын кун йӧскалык политика удысын ужасьёслы ӵектос туж тунсыко потӥз. Куинез ик нунал туж пайдалыко ортчиз. Ужрадэ пыриськисьёс трос выльзэ тодӥзы но матысь дыре тодон-валанъёссэс ужазы кутозы.