Ӧрилэн кенешонэз 4-тӥ номеро эмъян-тупатонъя ужъюртын радъямын вал Кылкутонэз быдэстонъя Федерал служба Удмурт Элькунъя кивалтонниысь начальникезлэн воштӥсез Наталья Щукина кивалтэмен. Вӧсяськисьёсын лулпуш-югдытон ужъя юанъёсты эскеризы Кылкутонэз быдэстонъя Федерал службаысь Удмурт Элькунъя кивалтонниысь начальниклэн юрттӥсез Сергей Шерман вӧсьчи, тупатонъя ужъюртъёсысь кадръёсъя но визьнодан ужъёсты чаклась начальникъёссылэн воштӥсьёссы, Удмурт митрополиысь вӧсьчиос, кудъёсыз судить карем адямиослы вӧсьбуръя эскерон уж нуо, озьы ик Удмуртиысь Мусульманъёслэн Улосвыл вӧсьбур кивалтонниысьтызы огмуртъёссы.

Кенешонэ ӧтемын вал Удмурт Элькунысь Тӧролэн но Кивалтэтлэн Администрациысьтыз терроризмлы пумит нюръяськонъя ёзэтысьтыз но УЭ-ысь йӧскалык политикая министерствоысь ужасьёс. Валтӥсь ужпум – 2023-тӥ ар понна валче ужамзылы йылпумъянъёс лэсьтон но азьланезлы выль программа юнматон.

Ӧрилэн кенешонэз сӥё-дано данъетанэн йылпумъяськиз. Судить карем адямиослы лулпуш-югдытон уж нуэмез понна таукаронэн пусъемын вал вӧсьчи Константин Жебалов, 8-тӥ номеро тупатонъя ужъюртын вӧсьбур юрттэт сётӥсь. Архиерейской грамотаосын данъетамын визьнодан ужъёсты чакласьёс: судить карем адямиослы визьнодан но мерлык уж сётонъя ёзэтысь начальникезлэн воштӥсез Роман Асфандияров но 1-тӥ СИЗО-лэн начальникезлэн воштӥсез Денис Сычев.

Удмуртиысь Мусульманъёслэн Улосвыл вӧсьбур кивалтонниысьтызы грамотаос сётэмын 8-тӥ номеро тупатонъя ужъюртлэн начальникезлэн воштӥсезлы Константин Кропотинлы но 12-тӥ номеро тупатонъя ужъюртлэн начальникезлэн воштӥсезлы Эльвира Магсумовалы.

Со сяна, Удмуртиысь Мусульманъёслэн Улосвыл вӧсьбур кивалтоннизы дунтэк сётӥз мусульман книгаос (50-лэсь трос) но 30 вӧсяськон пичи ковёръёс судить карем адямиослы, кудъёсыз исламлы оско.