17-тӥ оштолэзе Удмурт кун университетын «Россия – Китай: перспективы научно образовательного и внешнеэкономического сотрудничества» калыккуспо форум усьтӥськиз. Со Удмуртилэн но Китайлэн дышетон удысын кусып возёназы 35 ар тырмонлы сӥземын, но озьы ик Россилэн но Китай Калык Элькунлэн лулчеберетъёссылы сӥзем Арлы, кудӥз Владимир Путинэн юнматэмын.

Сӥё-дано усьтонын вераськизы Китай Калык Элькунлэн Казаньысь Генеральной консулэз г-н Сяо Бо, Далянь университетысь ӵош дышетон программаосъя ёзэтлэн кивалтӥсез г-жа Се Цзяси, УЭ-ысь экономикая министрлэн воштӥсез Алексей Владимирович Братухин но ООО «Новый дом» персоналэз азинтонъя ёзэтлэн начальникез Татьяна Сергеевна Маслова. Нижний Новгородысь Р.Е. Алексеев нимо кун технической университетлэн ректорез, «Волга-Янцзы» университетъёслэн Ассоциацизылэн сопредседателез Сергей Дмитриев Ассоциацизылэн уженыз тодматӥз.

«Оскисько, та форум Россия Федерацил эн но Китай Калык Элькунлэн туала вакытлэн тодос, дышетон но внешнеэкономической удысъёсын кусып воземзылы кулэ луись площадка луоз», – пусйиз генконсул.

Форум улсын университетын тодослыко-практической конференция радъязы, кудӥз Россия но Китай кунъёслэн ӵош ужамзылы сӥземын. Кенешизы китай кылэз Кылъя но литературая институтын дышетон программае пыртон сярысь, озьы ик ӟуч-китай вачеужанэз азинтон понна ӧнерчиосты дасян сярысь.