Удмуртиын йылпумъяськиз Россия Федерациысь финн-угор калыкъёслэн ассоциацизылэн проектэз – Азьветлӥсьёслэн йӧскалык школазы ортчиз, кудаз Россиысь 32 улосвылъёсысьтыз егитъёс вуизы. 100-лэсь трос кибашлы но мыло-кыдо адямиос элькунмылэн шоркараз пумиськизы, этнокультура удысысь ӵектосъёссэс адӟытӥзы, выль йӧскалык кичӧлтонъёсын тодматскизы.

«Ӵектосмыслэн азьмугез – егитъёсын валче ужаны Россия Федерациысь пӧртэм калыкъёслэсь кусыпъёссэс но кылзэс умоятон, азинтон но утён удысын, озьы ик кадръёсъя сӧзнэтэз кылдытон бордын. Азьветлӥсьёслэн йӧскалык школазы – огмылкыдъем адямиосын вераськон, аслэсьтыд кужмо палъёстэ азинтон, кунмес юнматон понна йӧскалык кусыпъёс удысын тодон-валанъёсын вошъяськон», – вераз Финн-угор калыкъёслэн ассоциацизылэн председателез, сенатор Петр Тултаев.

Ужрадлэн сӥё-дано усьтоназ люкаськемъёс азьын вераськиз Удмуртиысь Тӧролэн но Кивалтэтлэн Администрацизылэн кивалтӥсез Александр Журавлев:

«Удмуртилэн Тӧроезлэн Александр Владимирович Бречаловлэн нимыныз тау карисько Россия Федерациысь финн-угор калыкъёслэн ассоциацизылы но Йӧскалык ужъёсъя федерал агентстволы, угось школаез ортчытон понна милесьтым элькунмес бырйиды. Оскисько, со юнме ӧвӧл – Удмуртиысь егитъёс трос ӵектосъёсты улонэ вӧлмыто, Президент фондлэн юрттэмезъя. Элькунысь соос федерал уровене но пото. Кылсярысь, Бадӟым этнографической диктантэз табере Россиысь пӧртэм улосвылъёсын но мукет кунъёсын гожъяло. Асьмелэн огъя ужмы юрттоз выль ӵектосъёсты, кичӧлтонъёсты азинтыны, йӧскалыккуспо музъем вылын тупаса но огкылысь улыны, асьме калыкъёсмылэсь лулчеберетсэс утьыны. Улосъёсады тӥ – азьветлӥсьёс, тӥ шоры мукет егитъёс учко».

Ужрадын озьы ик вал Удмурт Элькунысь Кун Кенешлэн Тӧроезлэн воштӥсез, тодосъя, дышетонъя но граждан мерлык институтэз азинтонлы юрттэт сётонъя ялан ужась комиссиезлэн председателез Татьяна Ишматова но Марий Эллэн Кун собраниезлэн председателез Михаил Васютин.

«Ми данъяськиськомы егитъёслэн йӧскалык-лулчеберетъя огазеяськонъёсысьтызы азьмынӥсьёсын. Арлы быдэ соос этнокультура удысъя пӧртэм ужрадъёс ортчытъяло, ӵектосъёсты улонэ вӧлмыто, кудъёсыз ас калыксылэсь лулчеберетсэ, кылзэ но сям-йылолъёссэ утёнлы сӥземын. 2024-тӥ арын егитъёслэн йӧскалык-лулчеберетъя огазеяськонъёссы та ужпумъёсты улонэ пыӵатон понна федерал грантъёс пыр 5 миллионлэсь трос манет утӥзы», – вераз УЭ-ысь йӧскалык политикая министр Эдуард Петров.

Ужрадлэн нырысетӥ нуналаз вань люкаськемъёс этнокультура удысъя площадкаосы пыриськизы, отын медиа, йӧскалык семья ужбергатонэз азинтон, этнодизайн, арт устолык, крезьгур но дӥськут удысысь ӵектосъёс возьматэмын вал. Та сярысь Удмуртиысь устолыкъя но йӧскалык-лулчеберетъя огазеяськонъёслэн азьмынӥсьёссы пыр-поч веразы.

Азьветлӥсьёслэн йӧскалык школазы ортчон вакытэ кылдӥз выль ёзэс –Россиысь финн-угор калыкъёслэн ассоциацизы бордысь Егитъёслэн кенешсы. Отчы пыризы кибашлды удмурт егитъёс, соос пӧлын УЭ-ысь йӧскалык политикая министерстволэн йӧскалык кусыпъёсты умоятонъя ёзэтлэн начальникез Александр Корепанов но Калыкъёслэн Эшъяськон юртсылэн кивалтӥсезлэн воштӥсез Алина Жуйкова.

Кыкетӥ нуналэз Брангуртысь Песянайёсын пумиськизы, «Кузьыликар» нылпи театр труппаен тодматскизы. Дизайнер, реставратор Татьяна Москвина куноосты аслаз «Дэрем» студияз мыло-кыдо пумитаз. Со кышномурт но воргорон йӧскалык удмурт дӥсьёслэн аспӧртэмлыксы сярысь вераз. «Удмуртиысь синпелет» мастер-классын ваньзы люкаськемъёс асьсэлы кузьымъёс кылдытӥзы.

Йылпумъяськись нуналаз Александр Журавлев но Петр Тултаев пумиськизы, соос Удмуртилэсь ассоциацилэн ӵектосъёсаз пыриськемез но Азьветлӥсьёслэсь йӧскалык школазэс ортчытэм пумысен кенешизы.

Со сяна, форум улсын «Наши Герои СВО» туспуктэмъёсын адӟытон усьтӥськиз. Отын возьматэмын нимысьтыз ожгар операциысь геройёс но соослэн семьяоссы. Удмуртиысь куинь туспутэм адӟытэмын вал.

Азьветлӥсьёслэсь йӧскалык школазэс радъя Россия Федерациысь финн-угор калыкъёслэн ассоциацизы, солэн юрттӥсьёсыз луо Йӧскалык ужъёсъя федерал агенство, УЭ-ысь йӧскалык политикая министерство но Калыкъёслэн Эшъяськон юртсы.