3-6-тӥ пӧсьтолэзе Ижкарын ортчоз Россиысь антропологъёслэн но этнологъёслэн XII Конгрессы. Ӵапак та форумез дасян сярысь Удмурт Элькунлэн Тӧроез А.В. Соловьёв кенешиз политика тодосъёсъя докторен, профессорен В.Ю.Зоринэн, истори тодосъёсъя докторен но Кун Думалэн депутатэныз А.Е. Загребинэн но Удмурт Элькунысь йӧскалык политикая министрен Л.Н. Бурановаен.

Ортчоно Конгресслэн темаез «Миссия этнологии: научные традиции и современные вызовы». Тодосчиос татын эскерозы этнология тодосын историографилэсь интызэ но ӧръёссэ, этнологиын тодоскуспо герӟетъёсты, этнологиез дышетонэз, этнологилэсь мерлыкын интызэ но трос мукет юанъёсты.

В.Ю. Зорин 2009-тӥ арысен Россиысь тодосъёсъя Академиысь Этнологияя но антропологияя институтлэн кивалтӥсезлэн воштӥсез луэ. Вазенгес со вал Россия Федерацилэн Кун Думаезлэн депутатэз, Россилэн Президентэзлэн Приволжск федерал округысь осконо муртэзлэн воштӥсез.

«Мынам малпамея, туннэ нунал понна Ижевск россиысь антропология но этнология тодосъёслэн шоркарзы луэ. Та чебер кылъёс гинэ ӧвӧл, со озьы ик вань. Татын туж зол тодос школа, ӟеч сямъёс кылдэмын, тӥляд трос тодон-валанъёс но быгатонлыкъёс люкамын пӧртэм выжыысь калыкъёслэсь но пӧртэм осконэн адямиослэсь кусыпъёссэ радъян но юнматон удысын. Ми ӵемысь ӵошен ужаськомы элькунысьтыды Йӧскалык политикая министерствоен, Россиысь калыкъёслэн Ассамблеяенызы, кудӥныз али кивалтэ С.К. Смирнова. Оскиськомы, Конгресс вылӥ уровеньын ортчоз шуыса», – вераз В.Ю. Зорин. Профессорлэн ивортэмезъя, форуме кунгож сьӧрысь 200-лэсь ятыр тодосчиос пыриськыны мылкыд каро, соос пӧлысь одӥг ньыльмосэз лыктэмзэс юнматӥзы ини.

А.В. Соловъёв Конгресслы юрттыны мылкыдзэ вераз. «Ми тау кариськомы Кнгрессэз ортчытыны милесьтым шоркармес быръемды понна. Малпасько, милям зэм но вань ма вераны но мае возьматыны. Конгрессэз радъян бордын тырше Кун Думаысь милям депутатмыА.Е. Загребин, кудӥз озьы ик Россиысь антропологъёслэн но этнологъёслэн Ассоциациенызы кивалтэ. Оскисько, пӧсьтолэзьлы тодосчиосты пумитаны ваньмыз дась луоз шуыса».