Со карта ужаны кутскиз ни, отчы ӟуч но кунгожсьӧр ужбергатӥсьёс но инвесторъёс пыриськыны кутскизы. Та сярысь Россиысь экономикаез азинтонъя министр Максим Решетников ивортӥз Ужбергатонлы сӥзем нуналлэн пленарной кенешоназ, кудӥз ВДНХ-ын «Россия» форум-адӟытонын ортчиз.

Платформа Россия Федерацилэн улосвылъёсызлэн инвестици картаоссылэн тодэтъёссы вылын лэсьтэмын, кудъёссэ пыр-поч дасязы улосвыл инвестици стандартэз пыртон улсын Кивалтэтлэн нырысетӥ Председателезлэн воштӥсез Андрей Белоусовлэн кивалтэмезъя.

«Улосвылъёсын коньдон понэтъёсын ужез азинтон понна табере Россиысь инвестици карта юрттоз. Дасямы сое Москва Кивалтэтэн ӵош но та толэзьлэн кутсконаз уже лэзим. Ужбергатон понна со – пӧртэм ӵектослы музъем инты бырйыны луонлык: кафе усьтонысен бадӟым промышленной завод лэсьтонозь. Картае 14 сюрс пала инвестици площадкаослэн тодэтъёссы пуктэмын: быдӟалазы, тӥрлык-котырзы, юрттэт амалъёссы», – ивортӥз Максим Решетников.

Картаез ужбергатонлэн куремезъя лэсьтӥзы, сое дунъязы «Деловая Россия» огазеяськонлэн, Россиысь промышленникъёслэн но ужбергатӥсьёслэн огазеяськонзылэн но Россия Федерациысь Вузкаронъя-промышленной палаталэн огмуртъёсыз. Инвестици картаез эсэпрадо тырмытон но выльдон азинскыто улосвыл быдэсъясь тӧрлык ёзэтъёсты но инвестициосъя агентствоосты. Картае дась промышленной площадкаос пуктэмын, озьы ик лэсьтӥськон-пуктӥськон понна музъемъёс, гурт возёсэз нуонлы но пичи ужбергатонлы интыос.

Вуоно ӵектослэсь пайдаё луонзэ дунъяны пӧртэм луонлык вань: кытын но кинлы вузаны, югдурез капчиятыны, музъемул но инфрасӧзнэтлэсь ваньбурзэ тодыны – сюресъёслэн ӟечлыксыысен сотовой герӟетозь. Кытын ке но маиз ке но уг тырмы ке, карточкаосын пусъемын, кызьы со тырмымтэосты тупатыны луэ.

Карта быгатэ пӧртэм улосъёсысь интыосты утчаны но соослэсь луонлыкъёссэс ӵошатыны. Татын Россиысь улосъёсысь макроэкономикалэсь инъет луись возьматэмъёслэн тодэтъёссы люкамын, кудъёсыз ӵектосэз улонэ пыӵатонлы юрттыны быгатозы. Ваньмыз та юрттоз проектъя тыриськонъёсты чакланы но уксё ласянь кун юрттэт бырйыны.

Азьвылгес Россиысь экономикаез азинтонъя министерство инвестици ӵектосъёслы юрттэт сётонъя https://invest.economy.gov.ru портал кылдытӥз. 2023-тӥ ар понна та вотэсэз 80 сюрслэсь уно адямиос ужазы кутӥзы. Выль юрттэт амалъёс кылдӥзы, оглом соос 30 – кредит сётонлы юрттэт, вытъя но тупатэм уждунъя капчиятэм югдуръёс.