9-тӥ южтолэзе Калыкъёслэн эшъяськон юртазы Удмурт Элькунысь йӧскалык политикая министерстволэн йылпумъянъёсызъя заседаниез ортчиз.
Ужрадэ пыриськизы Россия Федерациысь Федерал Кенешлэн Кун Думаысьтыз депутат, йӧскалык ужъёсъя Комитетлэн ёзчиез Лариса Буранова, УЭ-ысь Тӧролэн но Кивалтэтлэн Администрациязы нырысетӥ кивалтӥсьлэн воштӥсез Дмитрий Миронов, УЭ-ысь Удмуртстатысь кивалтӥсьлэн воштӥсез Сергей Переверзин, кун тӧрлыкез быдэсъясь но интыосысь аскивалтэтысь огмуртъёс, йӧскалык-лулчеберетъя огазеяськонъёсысь кузёос но огмуртъёс, министерство бордысь Мерлык кенешысь но конфессиосысь ёзчиос.
Вазиськоназ Дмитрий Миронов вылӥ дунъяз кун йӧскалык политика удысын быдэстэм ужез. Со сяна, пусйиз на, туала вакытын калыкъёс но конфессиос вискын ӟеч кусып возён бадӟым инты басьтэ шуыса.
Россия Федерациысь Федерал Кенешлэн Кун Думаысьтыз депутат, йӧскалык ужъёсъя Комитетлэн ёзчиез Лариса Буранова вераз, шаерез утён удысын йӧскалык политикалэн ужез кулэлыко луэ шуыса.
Коллегиез усьтӥз йӧскалык политикая министр Эдуард Петров. Со тодэ вайытӥз федерал повесткаез но дуннеысь йӧскалык политика удысысь бадӟым югдуръёсты. Озьы ик, министерсволэн 2022-тӥ ар понна ужаменыз но 2023-тӥ арлы ужпумъёсыныз тодматӥз.
«2022-тӥ арын валтӥсь политической югдур – Россиысь Президентлэн «Об Основах государственной политики по сохранению и укреплению традиционных российских духовно-нравственных ценностей» нимо указэз луэ. Лулчеберетъя наследилы сӥзем Арлэн одӥгез шор йылпумъянэз – 2022-тӥ арын коньывуонэ «О нематериальном этнокультурном достоянии Российской Федерации» федерал катэз уже кутон», – вераз Эдуард Петров.
«УЭ-ысь Дэри ёрос муниципал округ» муниципал кылдытэтын 2025-тӥ арозь РФ-ысь кун йӧскалык политика Стратегиез быдэстон сярысь ивортӥз Дэри ёросысь социал комплексъя кивалтӥсьлэн воштӥсез Гульнара Шнейдер.
Калыкъёслэн Эшъяськон юртсылэн директорез Юлия Шахтина кун йӧскалык политика удысысь Ресурсной центрлэн азинскеменыз тодматӥз.
Заседаниын конфессиос вискын кусыпъёс сярысь веразы Удмурт митрополитлэн тӧроез Митрополит Викторин но Удмуртиысь муфтий Фаиз-хазрат Мухамедшин.
Калыкъёс вискын кусыпъёсты умоятонъя Егитъёслы сӥзем мерлык огазеяськонъёслэн кулэлыксы сярысь мадиз Виолетта Анисимова, «Шунды» огазеяськонлэн председателез.
Докладъёс бере усточиосты тау каронъёсын но сӥё-дано грамотаосын пусйизы. Коллегия йылпумъяськиз тематической секциослэн ужъёсынызы.