Воронеж, Алтай, Оренбург, Хакасия, Тыва но Татарстан улосвылъёсысь егит блогеръёс Ижкаре лыктӥзы, соос «В гостях у носителей языка» медиа-дышетон ужрадэ пырисько.

Туннэ азьветлӥсьёс Удмурт Элькунысь Кузебай Герд нимо йӧскалык лыӟетъюртэ вуылӥзы. Калыкъёслэн эшъяськон юртазы экскурсия радъямын вал, отын озьы ик медиа амалэн дышетскон семинар ортчиз.

25-28-тӥ коньывуонэ блог-туре пыриськисьёслы удмурт но бесермян кылъёсты утёнъя но вӧлмытонъя тужгес но умой практикаосын узыр программа дасямын. Ужрадъёс Ижкарын, Сарапулкарын, Карамас-Пельгаын, Пичи Пургаын, Лудорвайын ортчо.

Со сяна, 28-тӥ коньывуонэ мылкыд карись журналистъёс но ӵектослэн ужрадаз пыриськыны быгато:

11:00 – кыл практикаосъя кылдэм малпанъёс пумысен котрес ӝӧк. Калыкъёслэн эшъяськон юртсы (Орджоникидзе ур., 33а юрт).

15:00 – блог-туре пыриськисьёсын пресс-конференция, отын соос ветлэмзы пумысен мылкыдзэс но йылпумъянъёссэс шараялозы.

Ӵектос йӧскалык ужъёсъя Федерал агенстволэн но Удмурт Элькунысь Йӧскалык политикая министерстволэн юрттэмезъя Йӧскалык кусыпъёсъя ресурсной центрен радъяське.