2023-тӥ аре 14-тӥ гудырикошконэ Удмурт кыллэн йӧскалык Корпусэз пыртэмын Федерал службалэн интеллектуал асъетъя Реестраз (Роспатент). Удмурт кыллэн Йӧскалык корпусэз – ивортодэтлыко сӧзнэт, кудӥз кылдытэмын удмурт кылкуэтъёсты (текстъёсты) электрон амалэн бичаса. Та сӧзнэт Интернетын нимысьтыз вотэсбамын интыяськемын.

Али дыре «Удмурт кыллэн йӧскалык корпусэз» ивортодэтлыко сӧзнэтэз кылдытон удысын бадӟым уж мынэ: туала литература кыллэсь корпуссэ люкан, удмурт сямен гожтэм синпелетъёсты корпусэ пыртон, нош азьланяз татчы вераськетъёсысь диалект кылъёс, параллельной (удмурт но ӟуч сямен) но мукет кылкуэтъёс пырозы на.

Туннэ нуналлы Корпуслэн быдӟалаез ог 6,2 миллион кылъёс.

Озьы ик вотэсбаме интыямын удмурт-ӟуч но ӟуч-удмурт кыллюкамъёслэн электрон вариантъёссы. Таӵе форматэн луэ валатонъёсты ӟуч кылысь удмуртэ берыктыны но удмуртысь – ӟуч кылэ, озьы ик ас утчамедлэсь историзэ учкыны, кылэз гожтон вакытэ юрттӥсь автоматической чӧлскет-ссылкаез уже кутыны. Удмурт кылэз утчаку, ӝ, ӟ, ӥ, ӧ, ӵ гожпусъёсты поттон понна нимысьтыз панель вань.

Туннэ нуналлы удмурт кыллэн Йӧскалык корпусэзлэн сӧзнэтэз луонлык сётэ:

• кылкаблэсь (словоформалэсь) но кылтэчетъёслэсь кулэ кабзэс шедьтыны, соку лыдэ басьтӥсько вотэсбаме пыртэм ваньмыз текстъёс;
• грамматика ласянь кыллэсь формазэ утчаны;
• авторъёслэн нимъёссыя утчаны;
• печатлам аръёсты лыдэ басьтыса утчаны;
• подкорпусъёсъя утчаны;
• шедьтэм кылкаб сярысь пыр-поч ивортодэт шедьтыны: авторез но гожтослэн нимыз сярысь, кыӵе ошмессинмысь вуэмез сярысь но мукет;
• кыллэсь морфология ласянь радъяськемзэ но ӟуч кылэ берыктэмзэ учкыны;
• утчамлэсь йылпумъянъёссэ Excel электрон таблица амалэн кӧчыртыны (скачать карыны), отын текст но солэн ошмессинэз сётэмын луоз.

Логотиплэн инъетэз: удмурт алфавитлэн аспӧртэмлыко гожпусъёсыз – «толэзьлэн» тямыс сэрего пусэз.

Корпус сӥземын ваньзылы, кин удмурт кылэн герӟаськем юанъёсын тунсыкъяське: кылтодосчиослы, кылъя дышетӥсьёслы, школаысь пиналъёслы но студентъёслы.

Та проект улонэ пыӵаз Удмуртилэн кунлык басьтонэзлы 100 ар тырмонзэ ортчытон улсын Удмурт Элькунысь Кивалтэт юрттэмен.

УдмФИЦ УрО РАН-лэн партнёръёсыз луо Удмурт Элькунысь йӧскалык политикая министерство, йӧскалык лыдӟетъюрт, ООО «Нооматика».

Корпусэз бадӟыматон но муромытон быдэстӥське Президент ӵектосъя Россиысь егит тодосчиослы кун юрттэт улсын, со грантэз утӥз Мария Безенова – УдмФИЦ УрО РАН-лэн историяя, кылъя но литературая Удмурт институтэзлэн кылосбур ёзэтаз ужась тодосчи.