21-тӥ инвожое Ижкарын С.М. Киров нимо паркын но «Купол» заводлэн стадионаз бигер но башкир калыклэн «Сабантуй» шулдыръяськонэз ортчиз.

Калык понна та шулдыр праздникез арлы быдэ Удмурт Элькунысь йӧскалык политикая министерство но мерлыко огазеяськонъёс радъяло.

Люкаськем калыкез праздникен ӟечкылаз Удмурт Элькун Тöролэсь ужзэ быдэсъясь Александр Васильевич Соловьев: «Уно аръёс ӵоже элькунамы улӥсь калыкъёс куспазы тупаса, одӥг семья выллем уло. Туннэ та шулдыр праздникез бускельёсынымы, Татарстанэн, ӵошен пусйиськомы. Ижкарын улӥсьёслы, куноослы сӥзисько шуд но тазалык!»

Татарстан Республикаысь Сабинск ёросысь делегаци калыкез Татарстан Республикалэн Президентэзлэн нимыныз ӟечкылаз. Рустам Нургалиевич Миннеханов аслаз вазиськоназ тау карем бигер калыклэн сям-йылолъёсызлы саклык висъямлы.

Њечкыланъёс но таукаранъёс чузъяськем бере, калыкез шулдыртӥзы ёросъёсысь лыктэм коллективъёс. Кутскизы ужаны пöртэм площадкаос: кин ке юбо йылэ тубаз, мукетъёсыз мешокен жугиськыса кужымзэс мертазы, куинетӥосыз ведраосын бызьылонын шаплыксэс возьматӥзы. Сабантуйлэн валтӥсь вожвылъяськонэз – «Корэш» трос адямиосты котыраз люказ, котькин аслаз батырез понна висиз! Туэ така Татарстанысь Сабинск ёросэ кошкиз, отысь лыктэм батыр, Дилюс Закиров, тужгес но кужмо вылэм.

Сабантуй калыклэсь инкуазез но сям-йылолъёсты гажамзэ гинэ уг возьматы, со возьматэ пöртэм калыкъёслэсь ог-огзэс гажамзэс но. Таиз тупаса улонлэн инъетэз луэ ини

Та нуналъёсы ик Сабантуй ортчиз Можгаын, Воткинскын, Сарапул ёросын.