Нырысьсэ таӵе ужрад Ижкарын 2021-тӥ аре ортчытэмын вал. Россия Федерациысь йӧскалык политика удысын со бадӟым инты басьтӥз. Пыриськисьёс лыдпус но ивортодэт ӧрын кылэз азинтонъя, егитъёслэн кичӧлтонъёссыя но ӵектосъёсъя юанъёсты эскеризы.

Таяз аре солэн программаез сӥземын луоз тодос, лулчеберет, ивортодэт, кыл но мукет удысъёсты финн-угор калыкъёс пӧлын вӧлмытонлы.

Пумиськон улсын малпамын:

– пленарной кенешон но секциослэн ужанзы, кудъёсыз IT-технологиослы сӥземын, отын калык лулпушлэн ваньбурез, лулчеберет но кыл азьпал радэ потоз;

– кун йӧскалык политика удысысь асдыръем юанъёсты эскерон, кун тӧрлык ёзэсъёслэн но коммерциен герӟаськымтэ огазеяськонъёслэн валче ужамзы сярысь вераськон.

Форумын финн-угор калыкъёслэсь кылзэс, лулчеберетсэс, сям-йылолъёссэс утёнлы но азинтонлы сӥзем Россиякуспо вожвылъяськонлы йылпумъянъёс лэсьтэмын луозы.

Ужрадэ Россиысь 35 улосвыл субъектъёсысь делегатъёс пыриськозы. Удмурт Элькунлэсь данзэ 23 адями утёз. Соос пӧлын быдэсъясь но каткылдытӥсь тӧрлыкысь, этнокультурной мерлык, эскерет, тодос огазеяськонъёсысь, дышетон но лулчеберет ужъюртъёсысь огумуртъёс.