26-тӥ тулыспалэ 2017-тӥ аре Сигаево черкогуртын «Вӧйдыр» элькун шулдыръяськон ортчиз. Вӧйкеляны элькунмылэн ёросъёсысьтыз но каръёсысьтыз делегациос пыриськизы.

Люкаськем калыкез ӟечкылазы Удмурт Элькунысь Кун Кенешлэн Тӧроез Владимир Невоструев, Удмурт Элькун Кивалтэтлэн Тӧроезлэн воштӥсез Сергей Фефилов, Удмурт Элькунысь йӧскалык политикая министр Лариса Буранова, Удмурт Элькун Кивалтэт бордысь ЗАГС ужпумъёсъя комитетлэн кивалтӥсез Людмила Попова, «Сарапул ёрос» муниципал кылдытэтлэн тӧроезлэсь ужзэ быдэсъясь Айдар Шарахутдинов, «Вотка ёрос» муниципал кылдытэтлэн тӧроез Андрей Русинов, «Удмурт Элькунысь ӟуч лулчеберетъя огазеяськон» мерлыко огазеяськонлэн тӧроезлэсь ужзэ огдырлы быдэсъясь Светлана Щапова.

“Вӧй – со шулдыръяськон, кудзэ котькин яратэ, пусъё сое котьку шулдыр но яркыт. Со асьмелы огазе люкаськаськыса тулысэз пумитаны луонлык сётэ”, – пусйиз Лариса Буранова. – Шумпотымон туннэ котькин лыктэмын аслаз семьяеныз, нылпиосыныз. Умой шутэтске, одно ик веръялэ табанез но мукет сиён-юонъёсты, вуоно арды тыро но азинлыко мед луоз шуыса”.

Кылем арын сямен ик, туэ но «Масленичная благодать» юрттэт сётон марафон ортчиз. Табань вузаса 126 сюрс 292 манет люкаськиз. Та коньдонэз Сигаево черкогуртэ сьӧлыктэм Владимир князьлы сӥзем храм ӝутыны сётозы. Кылем арын таӵе ик марафонын, кудӥз ортчиз Вотка ёросысь Перевозное черкогуртын, люкамын вал 30 сюрслэсь ятыр коньдон.

Валтӥсь сцена вылын калыкез шулдыртӥзы ёросъёсысь лыктэм коллективъёс: «Кумушки», «Ветераны в строю», «Гармошечка-говорушечка», «Сударушка», « Казмасские напевы», «Светлица», «Живой родник», «Дружба» но мукет.

Котьку сямен радъямын вал пӧртэм шудон-серектонъёс, вожвылъяськон-ӵошатсконъёс, вузкарон-адӟытонъёс. Соин ик тросэз куноос пӧртэм синпель-кузьымъёсын но данъянъёсын доразы бертӥзы .

Ужрадэз ортчытӥзы «УдмуртЭлькунысь ӟуч лулчеберетъя огазеяськон» мерлыко огазеяськон, Удмурт Элькунысь йӧскалык политикая министерство, Калыкъёслэн Эшъяськон юртсы но «Сарапул ёрос» муниципал кылдытэт.