9-тӥ южтолэзе Сарапулысь «Электрон – Центр возрождения и развития национальных культур» лулчеберетъя Дворецын ортчиз чеберлыкъя но быгатонлыкъёсъя II йӧскалыккуспо «Мисс Содружество» вожвылъяськон. Ужрадэз ортчытӥзы Удмурт Элькунысь йӧскалык политикая министерство но Сарапул карлэн Администрациез.

Вожвылъяськонэ пыриськизы Ижкарысь, Сарапулысь, Каракулино но Камбарка ёросъёсысь 12 йӧскалык лулчебертъя огазеяськонъёсысь 16-23 аресъем нылъёс.

Нылашъёсты сцена вылысь адӟемлэсь азьло ик, учкисьёслэн луонлыксы вал соослэн киужъёсынызы тодматскыны. Со понна фойеын адӟытон радъямын вал.

Вуиз дыр чеберайёсын но жюриен тодматскыны. Нылъёслэсь быгатэмзэс дунъязы министерствоысь, Сарапул карэн Администрациысьтыз ӧнерчиос, Сарапулысь ужбергатӥсьёс. Нырысетӥ этапын ортчиз тодматскон, нылашъёс веразы семьязы, эшъёсы, тунсыкъёссы но быгатонлыкъёссы сярысь.

Кыкетӥ этапын чузъяськизы удмурт, ӟуч, армян, азербайджан, иврит кылын кырӟанъёс, мылкыдэз ӝутӥзы бигер, грек, белорус, чуваш но немец калык эктонъёс.

Берпуметӥ этапын нылъёс асьсэ калык дӥсенызы потӥзы учкисьёс азе. Верантэм чебер вал котькудӥз.

Жюрилы капчи ӧй вал тамында чеберайёс пӧлысь тужгес но чеберзэ бырйыны. Озьы ке но ваньзы огкылэ вуизы – вормисе потӥз но «Мисс СОДРУЖЕСТВО» ним басьтӥз Карина Халилова, азербайджан мерлыко огазеяськонлэн Сарапулысь ёзэтэзлэн ёзчиез. Учкисьёс но жюриен соглаш луизы, соослы но та нылаш тужгес яраз.

Вице-мисс луиз Ижкарысь Елизавета Костенкова, еврей калыклэн мерлыко огазеяськонэзлэн ёзчиез. Со ик Интренет пыр тужгес трос куара люказ но «Вотэсбамысь чеберай» («Виртуальность») ним басьтӥз.

Кыкетӥ Вице-мисс Камбарка ёросысь поръёслэн мерлыко огазеяськонзылэн ёзчиез , Дарья Хайретдинова.луиз

Арина Дмитриева, Сарапул ёросысь удмурт нылаш, «Дыдыкай» ним басьтӥз, нош Камбарка ёросысь бигер нылаш Эльмира Ахметвалиева «Йӧскалык чеберай» («Национальный колорит») ним басьтӥз.

Мария Кононова, Сарапул ёросысь украин нылаш, «Йӧспӧртэм чеберай» («Оригинальность») ним утӥз.

«Сям-йылолъёсты утись чеберай» («Живая традиция») ним тупаз Виктория Фалалеевалы, «Видергебурт» мерлыко огазеяськонлэн ёзчиезлы.

«Калык шӧм» («Этно») нимез сётӥзы Каракулино ёросысь ӟуч нылашлы, Елена Семакиналы.

Жюрилэн малпамезъя, Сарапул ёросысь армян нылаш Ася Саакян кык номинациын вормисе потӥз: «Кильтрес нылаш» («Стиль») но «Йӧслыкез дунъяны быгатӥсь чеберай» («Толерантность»).

Софья Жуйкова, Сарапулысь грек огазеяськонлэн ёзчиез, «Мусокай» («Грация») нимлы кузё луиз.

Анастасия Васильевалэсь, Сарапул ёросысь чуваш ныллэсь, жюри вылӥ дунъяз ассэ калык азьын, сцена вылын возьыны быгатэмзэ но «Артистлыко чеберай» нимен пусйиз.

Белорус лылчеберетъя мерлыко огазеяськонлэн Сарапул ёзэтэзлэн ёзчиез Екатерина Хаткевич паймытӥз чебереныз но быгатонлыкъёсыныз, соин ик сое «Котьма ласянь учкымон нылаш» («Совершенство») нимен тодмостӥзы.

Ужрад йылпумъяськиз. Котькин капчи мылкыдын кошкиз. Таӵе ужрадъёс дышето калыкъёслэсь лулчеберетсэс дунъяны, куспамы эшъяськыса, огкылысь улыны.