3-тӥ южтолэзе Ижкарын Калыкъёслэн эшъяськон юртазы «Секреты удмуртских мастеров» (12+) книгаен тодматон ортчоз, ужрад 16.00 часын кутскоз.

Книга 2019-тӥ ар пумын «Удмуртия» издательствоын потӥз, сое Удмуртилэн кунлыкезлы но Вотской комиссариатэн нырысетӥ книгаосты поттонлы (1920-тӥ арын южтолэзе) 100 ар тырмонлы тупатӥзы. Бичетын удмурт кибашлыослэн 19-тӥ даурысен 21-тӥ даур кутсконозь ужамзы возьматэмын. Нимаз висъямын уйпал, лымшор удмуртъёслэн, озьы ик бесемранъёслэн юртъер котырзэс тупатон-радъян йылолъёссы, дӥськутъёссылэн аспӧртэмлыкъёссы. Книга-альбом бордын ужамзы сярысь издательстволэн кивалтӥсез Юрий Кузнецов но валтӥсь редакторез Георгий Грязев вералозы. Фольклор кырӟанъя но эктонъя «Айкай» театр удмурт кырӟанъёсты но эктонъёсты быдэстоз. Со сяна, Йӧскалык лыдӟетъюртысь Йӧскалык но шаертодон литературая но библиографияя центр фондъёсысьтыз книгаосын «Калык вера, калык лэсьтэ: из сокровищницы народных талантов и промыслов» адӟытон радъялоз. Ужрадэ вань мылкыд карисьёсты ӧтё, пыронэз дунтэк.

Ивор кутэмын Удмуртия ИА-лэн бамысьтыз.