6-тӥ инвожое Кияса ёросысь Унур-Киясово гуртын поръёслэн «Семык» йӧскалык элькун шулдыръяськонзы ортчоз.

Семык – поръёслэн дырпусазы валтӥсь шулдыръяськонзы. Со гужем вуэмез пусъе, гужем шулдыръяськонъёслы кутскон сётэ. Вашкала дыръя Семыкез куинь нунал ӵоже пусйизы. Вирнуналэ егитъёс мыно вал луд вылэ, татын шудо, экто, кырӟало, тылскем вылтӥ тэтчало, асьсэлы пар утчало. Удмурт арня нуналэ вань калык шулдыръяське вал ини. Та нуналэ ӵемысь сюанъёс но шудылӥзы. Кылем арлэсь темазэ азьланьтыса, туэ шулдыръяськон сюанлы, семья кусыпъёслы сӥземын луоз (тодады вайытом, кылем арын шулдыръяськонын егитъёслы асьсэлы пар утчазы). Соин ик праздниклэн программаяз ёгит семьяослы «Кык юсьёс» вожвылъяськон радъямын луоз. Котьку сямен куноосты витё пӧртэм шудонъёс, вожвылъяськон-ӵошатсконъёс, ческыт вӧсям ӝук, жингрес кырӟанъёс, задор тыпыртонъёс. Шулдыръяськонэ вуозы Алнаш, Грак, Камбарка, Каракулино, Кизнер, Кияса, Пичи Пурга, Сарапул, Сюмси, Воткинск ёросъёсысь, Татарстанысь, Башкортостанысь, Марий Элысь, киров улосысь делегациос. Семыклэн валтӥсь меретъёсыз: калык сям-йылолъёсты утён но азинтон, йӧскалык кусыпъёсты юнматон, егитъёслы калыкез но солэсь историзэ гажан пыӵатон.

Шулдыръяськонэз радъяло: Удмурт Элькунысь йӧскалык политикая министерство, Калыкъёслэн Эшъяськон юртсы, «Кияса ёрос” муниципал кылдыдэт Администраци, «Удмуртиысь поръёс» йӧскалык автономия, «Одо Мари Ушем – Союз Марийцев Удмуртии» мерлыко огазеяськон.

Программа:

09.00 – 11.00 «Вашлиймаш» – куно пумитан;

11.00 – 12.00 шулдыръяськонэз усьтон;

Площадкаослэн ужзы:

12.00 – 15.00 валтӥсь сцена вылын концерт;

12.00 «Мужыр йўксӧ» – егит семьяослы вожвылъяськон;

«Йоча модыш вер» – нылпиослы шудон сэрег;

«Ÿнарлык вер» – спорт площадка;

«Мастарлык ола»/«Город мастеров» – кибашлыослэн ужъёсынызы адӟытон;

«Кечывал кочкыш» -вӧсям ӝукез сиён;

15.30 – 16.00 куно келян.