23-тӥ толшоре Калыкъёслэн Эшъяськон юртазы, В.Н. Завалинэз буре вайса, шахматъя кыкетӥез улосвылкуспо турнир ортчиз.

Турнирез радъяз Удмурт Элькунысь армянъёслэн «Урарту» мерлыко огазеяськонзы.

Огазеяськонлэн кивалтӥсезлэн М.М. Аракелянлэн малпамезъя, шахмат – визез сынась спорт, татын малпаськыны кулэ, йырез ужатоно. М.М. Аракелян шуныт кылъёсын тодаз ваиз В.Н. Завалинэз: «Соин уж капчиен ачиз лэсьтӥське вал. Владимир Николаевич мыло-кыдо вераськиз котькинэн, ачиз лыктэ вал дорамы, юа юрттэт кулэ ӧвӧл-а шуыса. Котькуд калык сое аслазэн лыдъяз».

Котькуд ар мерлыко огазеяськонъёслэн ёзчиоссы мылысь-кыдысь пырисько та ӵошатсконэ. Туэ асьсэды эскерыны 12 команда мылкыд кариз: удмурт егитъёслэн «Шунды» мерлыко огазеяськонзы, «Ӟуч лулчеберетъя Удмурт Элькунысь огазеяськон» мерлыко огазеяськон, «Еврейёслэн лулчеберетсыя Уэмурт Элькунысь центр» мерлыко огазеяськон, «Удмурт Элькунысь бигер егитъёслэн «Иман» огазеяськонзы» мерлыко огазеяськон, Удмурт Элькунысь бигеръёслэн йӧскалык лулчеберетсыя улосвыл автономизы, Удмурт Элькунысь армянъёслэн «Урарту» мерлыко огазеяськонзы, «Удмуртиысь азербайджанъёслэн «Достлуг» мерлыко центрзы»мерлыко огазеяськон, «Вань удмуртъёслэн «Удмурт Кенеш» ассоциацизы» улосвылкуспо мерлыко огазеяськон, «Батьковщина» белорус лулчеберетъя Удмурт Элькунысь огазеяськон» мерлыко огазеяськон, «Громада» украин лулчеберетъя Удмурт Элькунысь огазеяськон» мерлыко огазеяськон, «Удмурт Элькунысь мордваослэн «Умарина» огазеяськонзы» мерлыко огазеяськон, «Чечен йӧскалык лулчеберетъя «Даймохк» мерлыко огазеяськон.

Шудон ортчиз Швейцарской радъя. Озьы котькуд шудӥсь 7 парти ортчытӥз. Самой егитэз шудӥсьлы 8 арес гинэ ай. Валерия Королева быгатӥсен но кышкасьтэмен возьматӥз ассэ. Нылаш 4 арес гинэ вал ай шахматэн вырын кутскыкуз. Нырысетӥ дышетӥсез – песятаез. Бӧрысь тодон-валанзэ муромытыны кутскиз 6-тӥ номеро спорт школаын. Турнире пыриськемез понна нылашез дипломен пусйизы.

Нош вормисе потӥз «Удмурт Элькунысь бигер егитъёслэн «Иман» огазеяськонзы» мерлыко огазеяськонлэн командаез. Кыкетӥ инты басьтӥз Удмурт Элькунысь бигеръёслэн йӧскалык лулчеберетсыя улосвыл автономизы. Куинетӥ инты утӥзы «Батьковщина» белорус лулчеберетъя Удмурт Элькунысь огазеяськон» мерлыко огазеяськонлэн ёзчиосыз.

Ӟечкыласькомы вормисьёсты!