Ӵошатскон пӧртэм выжыысь, пӧртэм арлыдъем адямиослы пумиськыны, эшъяськыны луонлык кылдытэ. Со дыре ик берпуметӥ интыын ӧвӧл кужмооссэ шахматистъёсты шараян ужпум но. Турнир ортче Шахматэн шудонъя калыккуспо федерацилэн куронъёсызъя. Котькуд командаын быдэн куинь адями. Вормисьёсты шараяло соосын люкам очкоосты ватсаса.

Ӟырдыт вожвылъяськонын вормисе потӥз Белорус обществолэн «Батьковщина» командаез. Кыкетӥ луиз бигер егитъёслэн «Иман» огазеяськонзы. Нош куинетӥ – ӟуч лулчеберетъя общество.

Ужрадлэн йылпумъян люкетаз, син-пель кузьымъёсын пусъёнэ, пыриськиз Кун Думаысь депутат Алексей Загребин.

Кылем арын ӵошатсконэ 16 команда пыриськиз. Вормисе потӥз бигер егитъёслэн «Иман» огазеяськонзылэн командаез.

Тодэ вайытом, йӧскалык лулчеберетъя огазеяськонъёслэн шахматэн шудонъя турнирзы элькунын кемаласен радъяськылэ ни. Йӧскалык политикая министр Владимир Завалин улонысь кошкем бере (2013-тӥ арын 20-тӥ куарусёнэ), ӵошатсконэз солы буре ваёнлы сӥзизы.

Ивор кутэмын: Калыкъёслэн Эшъяськон юртсы