УЭ-ысь йӧскалык политикая министерство ёросъёсы ветлонзэ азинтӥз – министерствоысь ужасьёс Эдуард Петров министрен ӵош Шаркан ёросэ вуылӥзы.

Ёросъёсы таӵе потанъёслэн ужпумзы: ужрад ортчон дыръя калыкен пумиськон, Кун йӧскалык политикалэн Стратегиезлэн ужпумъёсыныз тодматон, азьланяз грант вожвылъяськонъёсы пыриськон понна, ӵектосъёсты эскерон но тупатон.

Кенешонын Шаркан ёрослэн азинскемез сярысь пыр-поч вераськизы, Удмуртиысь этносоциальной ужпумъёсты чакламез, экстремизмен нюръяськонэз пыр-поч эскерӥзы, коммерциен герӟаськымтэ огазеськонъёслэн эрикрадъя ужамзы сярысь юанъёсты сэрттӥзы-пертчизы.

Эдуард Степанович Шаркан ёрослэн Кивалтӥсез Василием Муклин улӥсьёсын пумиськон ортчытӥзы но сюлмаськытӥсь юанъёслы валэктон сётӥзы, тужгес но йӧскалык лулчеберетэз утён но школаын анай кылэз дышетон пумысен.

Программа йылпумъяськиз 2024-тӥ аре Шаркан ёросын «Гербер» ортчытонэз радъян комитетлэсь пуктэтсэ юнматонэн. Праздникез ортчытон понна кӧня ке луонлыкъёсты эскеризы, интызэ но дырзэ юнматӥзы – Быгы гурт котырын 15-тӥ инвожое.

Тунна нуналлы «Гербер» – тужгес но бадӟым йӧскалык ужрад, Удмурт Элькунысь удмурт лулчеберетлэн но сям-йылолъёслэн синучконзы, озьы ик удмурт огазеяськонъёс понна ас малпанъёссэс ог-огзылы шараян инты.

Вуоноез «Миннацлэн нуналэз» ужрад Глазкарын ортчоз.