27-28-тӥ тулыспал толэзе удмурт егитъёслэн «Шунды» мерлыко огазеяськонзы Удмурт Элькунысь йӧскалык политикая министерстволэн но Калыкъёслэн Эшъяськон юртсылэн юрттэменызы Татарстанысь Кукмор ёросысь Ошторма Юмъя черкогуртын удмурт лулчеберетлы сӥзем нуналъёс ортчытӥз. Бускель улосэ 18 адями мынӥз. Соос пӧлын иворчиос, дизайнеръёс, блог гожъясьёс, фольклор ансамбле пыриськисьёс, кырӟасьёс но крезьгурчиос.

Кукмор ёросын улӥсьёслэн 11%-эз удмуртъёс, 30 школа пӧлысь куатяз удмурт кылэз дышето. Ошторма-Юмъя школае куатьысьтыз но школаосысь дышетскисьёс люкаськизы. Татын соос тодматскизы Удмуртиысь егитъёслэн кичӧлтонъёсынызы, «Шунды» огазеяськонлэн ужрадъёсыныз но ӵектосъёсыныз, Dart газетэн. Бадӟым класъёсын дышетскисьёс мыло-кыдо пыриськизы журналистикая, дизайнъя, калык эктонъёсъя но сцена вылын шудонъя мастер-классъёсы. Пайдалыко но тунсыко дышетскемзы бере тодматскизы егит кылбурчилэн Богдана Анфиногеновлэн творчествоеныз но удмурт кылын «Пузкар» кино учкизы.

Школалэн ужрад орчытон бӧлетаз ӝытазе зэмзэ но пӧсь луиз. Татчы егитъёсын тодматскыны 100-лэсь ятыр адями люкаськиз. Сцена вылэ огзы бере огзы потазы Анна Образцова, фолк-группа Dukes, Мария Бочкарева, Анастасия Рысаева, Костя Никитин, рок-группа Peace Pu. Асласьтыз кырӟанъёссэ озьы ик быдэстӥз Кукмор ёросысь Микаль Михайлов. Йылпумъяськиз ӝыт удмурт позыръяськонэн.

-Милям таӵеез кемалась ӧй вал ни,- шуэ ӝытэз радъясьёс пӧлысь одӥгез дышетӥсь, егитъёсын ужсь Майя Танасева. – берло дыре адямиос ӝытъёссэс доразы ортчыто, мерлыко ужрадъёсы шер пырисько.

Мукет нуналэ пумиськон ортчиз Средний Кумор черкогуртын. Фолк-группа Dukes но татысь «Зангари» ансамбль кырӟанъёсынызы шулдыртӥзы.

Таин удмурт егитъёслэн лулчеберетэнызы тодматскон ӧз йылпумъяськы. «Шундыос» выль пумиськонъёслы дасясько.