21-тӥ тулыспалэ быдэс дунне пусъе Анай кыллэсь нуналзэ. Бере уг кылё «Шунды» огазеяськонлэн ёзчиосыз но. Та нуналэ соос Ижкарын но элькунмылэн пӧртэм ёросъёсаз трос пумо акциос но ужрадъёс ортчыто.

Кылем арын «шундыос» удмурт кыллы сӥзем акцизэс трамвайын радъязы. Калыклы кельшиз таӵе ужрад. Соин ик туэ но мытэм ужез азьланьтыны малпамын вал.

Озьыен 21-тӥ тулыспалэ 2-тӥ номеро трамвай 11.55 часэ «Промышленной» дугдылонниысь вырӟоз но «Буммаш» остановкаозь мыноз. Транспортлы удмурт шӧм пыртозы удмурт дэремен нылъёс но пиос, соос мынӥсь-ветлӥсьёсын удмурт сямен ӟечбуръяськозы, вераськозы, куноятозы удмурт сиёнэн. Та маршрутын вань иворъёс но ивортонъёс удмурт но ӟуч кылъёсын чузъяськозы. Таӵе тунсыко но кулэ акциез «шундыослы» радъяны юрттэ Ижкарысь «ИжГорЭлектроТранс» предприяти.

Озьы ик арысь аре шундыос ортчыто «Вераськы анай кылын!» акци. Кылем арын егитъёс 56-тӥ номеро гимназиысь дышетскисьёслы, Удмурт кун университетысь студентъёслы, министерствоосысь ӧнерчиослы, озьы ик огшоры ураметӥ ортчисьёслы мӧляязы «Мон удмурт кылын вераськисько» значок бырттылӥзы. Туэ таӵе акци Алнаш, Грак, Пичи Пурга, Дэри но Якшур-Бӧдья ёросъёсын ортчытыны малпамын.

Юанъёсъя вазиськыны луэ таӵе телефонъя: 8 950 811 07 34 – Гафуров Ренат, «Шунды» меррлыко огазеяськонлэн кивалтӥсезлэн воштӥсез.