10-12-тӥ толсуре Калыкъёслэн Эшъяськон юртсы но Удмурт егитъёслэн «Шунды» мерлыко огазеяськонзы Удмурт Элькунысь йӧскалык политикая министерстволэн юрттэменыз егитъёсты дышетонъя улосвылкуспо «Вуюись» семинар ортчыто.

Семинарлэн валтӥсь меретъёсыз: удмурт егитъёслэсь ужез радъяны быгатонлыкъёссэс будэтон, лэсьтэм ужзылэсь эмышсэ калыке поттыны дышетон, пӧртэм улосъёсысь удмурт егитъёслэн уженызы тодматскон но эшъяськон кусыпъёс радъян. Ужрадэ пыриськозы Удмурт Элькунысь, Татарстанысь, Башкириысь бадӟым класъёсын дышетскисьёс, студентъёс, удмурт мерлыко огазеяськонъёслэн ёзчиоссы но азьветлӥсьёссы.

Семинарлэн программаяз – «Ужбергатон», «Ивортодэто но PR-технологиос» «Брендинг», «Мерлыко уж» оръёсъя секциослэн ужзы, тренингъёс, адӟытонъёс, кыложъёс, «Дебаты» шудон. Та дыре ик Вань удмуртъёслэн «Удмурт кенеш» ассоциацизы удмурт егитъёслы «Удмурт-а мон?» улосвылкуспо форум ортчытоз. Озьыен семинаре люкаськем егитъёслэн луонлыксы луоз форуме лыктэм егитъёсын тодматскыны, соослэсь малы но солы дышетскны.

Ватсаса ивортодэт басьтыны луоз таӵе телефонъя: 8 904 837 14 33 (Тронина Ольга Алексеевна – «Шунды» огазеяськонлэн кивалтӥсез).