6-15-тӥ гудырикошконэ егитъёслэн «Ёлочка» лагеразы визьмо но усто удмурт нылпиос понна «Шундыкар» лагерь смена радъяськоз. Лагерьын элькунысьтымы, Башкортостанысь, Марий Элысь, Татарстанысь, Киров но Пермь улосъёсысь 120 нылпи шутэтскоз.

Лагерез радъя удмурт егитъёслэн «Шунды» мерлыко огазеяськонзы Удмурт Элькунысь йӧскалык политика министерстволэн юрттэмез улсын.

Арлы быдэ проектэ пырисько усто нылпиос, соос пӧртэм удысъя асьсэлэсь быгатонлыкъёссэс эскеро но паськытыто: эстрада но фольклор вокал, литература, суредаськон, журналистика, театр, киужъёс лэсьтон. Туэ пиналъёслы эшшо выльёсыз удысъёс чектэмын луозо -крезьгуро калык инструменъёсты лэсьтон но соосын шудыны дышетскон, видеоискусство, хореография, диськут дизайн.

«Шундыкарын» пиналъёс финн-угор лулчеберет удысысь иворъёсын, выль оръёсын тодматскозы, тодмо адямиосын тодматскозы. Сменалэн одигаз ужрадаз Удмурт Элькунысь йӧскалык политикая министр Л.Н. Буранова пыриськыны малпа.

Ватсаса ивортодэт басьтыны луэ таче телефонъя: (3412) 68-77-98 Удмурт Элькунысь йӧскалык политикая министерствоысь план лэсьтонъя этнокультура азинтонъя ёзэт.