Удмуртиын нылпи садэ ветлӥсь нылъёслы-пиослы но покчи класъёсын дышетскись пиналъёслы удмурт кылэз дышетонъя «Чингыли» мултимедийной курс дасялозы.

Анай кылзэ дышетон пиналлэн огъя азинсконаз бадӟым инты басьтэ. Туала педагогика тодосын нимысьтыз саклык висъяло кылэз дышетонын компьтерной технологиосты кутонлы, угось соос дышетон процессэз туала нылпиослы тунсыко, йыре кельтымон карыны юртто. Жаляса верано луэ, удмурт кылъя туала технологиосты кутыса дасям ужъёс ӧвӧл.

Кылдэм югдурез тупатон борды басьтӥськыны малпазы удмурт егитъёслэн «Шунды» мерлыко огазеяськонзылэн ёзчиосыз. Соос нылпи садысь пичильтокъёслы но покчи классъёсын дышетскисьёслы удмурт кылъя «Чингыли» мультмедийной курс дасялозы. Люкам материалзы дискен поттэмын луоз.

Татын пиналъёс шудыса тодматскозы анай кылынызы, трос выльзэ но тунсыкозэ тодозы удмуртъёс, котырысь инкуазь сярысь, дышетскозы пудо-животъёсты утьыны, вордӥськем шаерзэс гажаны. Дасяны чакламын куать минутъем дас видео-урокъёс. Тунсыко удмурт кыл дуннен пичильтокъёсты тодматозы выжыкылысь геройёс. Котькуд урок узырмытэмын дышетон шудонъёсын, логикаез азинтӥсь ужъёсын. Выль кылъёсты ӝог дышетыны юрттозы суредъёсын удмурт-ӟуч но ӟуч-удмурт аудио кыллюкамъёс. Со сяна, дискын гожтэмын луозы егит удмурт гожъяськисьёсын но поэтъёсын лыдӟем выжыкылъёс, кылбуръёс но мадиськонъёс.

Та ӵектос нылпиослэсь удмурт кылэз дышетыны мылкыдзэс ӝутоз, нылпи садын но школаын дышетӥсьёслы урокъёссэс вунонтэм но пуштрослыко карыны юрттоз.

Таӵе кулэлыко уж борды егит азьветлӥсьёс тыршозы 2016-тӥ арын тулыспалысен толсур толэзёзь.

Проект вормисе потӥз Удмурт Элькунысь йӧскалык политикая министерство элькунысьтымы мерлыко огазеяськонъёслы калыкъёслэсь кусыпъёссэс но ог-огзэсты валанзэс азинтыны юрттӥсь ӵектосъёсты быдэстыны субсиди сётон вылысь радъям вожвылъяськонын. Быдэстӥське удмурт егитъёслэн «Шунды» мерлыко огазеяськонэнызы «Мынам Удмуртие» телерадиокомпанилэн юрттэменыз.

Юанъёсъя вазиськоно таӵе телефонъя: 8 950 819 14 71 – Анастасия Тутаева («Шунды» огазеяськонлэн ёзчиез, ӵектослэн кивалтӥсез).