15-тӥ куарусёнэ Калыкъёслэн Эшъяськон юртазы удмурт егитъёслэн «Шунды» мерлыко огазеяськонзылэн XIV Йылпумъян-быръён конференциез ортчиз. Конференцие «Шундылэн» 19 ёрос ёзэтысьтыз делегатъёс, Татарстанысь, Башкортостанысь но Комиысь егитъёс, финн-угор егитъёслэн мерлыко огазеяськонъёссылэн азьветлӥсьёссы пыриськизы. Ваньзы соос огкылысь выль тӧрое Алина Черноваез бырйизы.

Со сяна егитъёс 2014-2016-тӥ аръёс понна йылпумъянъёс лэсьтӥзы, азьпалан быдэстоно ужпумъёсты чаклазы. Ужазы 4 секциос, кудъёсаз егитъёс ёросъёсысь но улосвылъёсысь ёзъёслэсь шуг-секытъёссэс сэрттӥзы-пертчизы, тодматскизы удмурт нылпиослэн «Шундысиос» движениенызы, эскеризы ивор вӧлмытӥсь ёзъёсты быгатыса но пайдалыко уже кутонэз, «Шунды» огазеяськонлэсь проектъёссэ азинтон сярысь кенешизы.

Конференцие ӧтем куноос пӧлын Удмурт Элькунысь физкультурая, спортъя но егитъёсын ужан политикая министр Игорь Краснов, Удмурт Элькунысь йӧскалык политикая министрлэн нырысетӥ воштӥсез Павел Орлов, Вань удмуртъёслэн «Удмурт Кенеш» огазеяськонзылэн кивалтӥсез Татьяна Ишматова вал.