Шырмачъёс ӵекто пенсиез выльысь лыдӟытыны пырымтэ ужам стаж сэрен

Йыружчиос пересьёслы жингырто но Россиысь мерлыко фондлэн (СФР) ужасьёсыз шуыса тодматско. Соос иворто, пенсиез трослы будэтыны луэ шуыса, лыдэ басьтымтэ ужам стажез выльысь учкыса, угось соос маке но выльзэ шедьтӥллям, пе. Шырмачъёслы оскисьёсты консультацие ӧтё Трос ласянь функциональной центре яке Россиысь мерлыко фондлэн (СФР) ёзэтаз ужпумез сэрттон-пертчон понна. Йыружчиос центръёслэсь но ёзэтъёслэсь зэмос адресъёссэс верало, кудъёсыз оскись муртлэн городаз интыяськемын.

Та шонер ивор адямилэсь саклыксэ лябомытэ. Пумиськонэ гожтӥськон понна адямилы кулэ аслэсьтыз паспортэзлэсь, СНИЛС-лэсь, ИНН-лэсь даннойёссэ но СМС-иворысь лыдпусэн кодэз вераны. Вань та люкам ивортодэт но лыдпусэн код шырмачъёслы кулэ луоз адямилэсь Госуслуги порталын учётной записьсэ талан понна. Со бере йыружчиос пӧям муртъёс пыр шугъяськытэк кредитъёс но займъёс октыны быгато.

Мар лэсьтоно:

Таӵе жингыртэм бере вераськондэс соку ик дугдытэ. Зэмос кун ужъюртъёслэн ужасьёссы, озьы ик Россиысь мерлыко фондысь (СФР) но, та выллем юанъёсын уг жингыртыло. Пӧртэм мерлыко удысын кылдэм юанъёсын кулэ жингыртыны Россиысь мерлыко фондлэн центраз 8-800-10-000-01 номеръя яке фондлэн матысь ёзэтаз вазиськыны. Ноку но нокинлы но эн вералэ асьтэлэсь даннойёстэс, картаостылэсь реквизитъёссэ, СМС-кодъёсты, аккаунтъёстылэсь логинъёссэ но парольёссэ.

Шырмачъёслэн выль схемаоссы но вылтусъёссы:

Шырмачъёс адямиосты пӧяло, Федерал службаысь судебной приставъёс луо шуыса тодматско.

Йыружчиос адямиослы жингырто но верало, соослэн трос пунэмзы вань но сое али ик тыроно шуыса.

Схема выль, воштӥськытэк кыле огез – кунмуртъёслэн счётъёссы доры вуон.

Ивортодэтэз официальной вотэсбамъёс пыр учкелэ!

Федерал службаысь судебной приставъёслэн вотэсбамзы – http://fssprus.ru. Яке тӥ быгатӥськоды судебной пристав доры нимаз мыныса квитанци басьтыны, собере со квитанциез меӵак яке «Госуслуги» портал пыр тырыны. Сак кариське, ноку но нокинлы но эн вералэ асьтэлэсь даннойёстэс.

Шырмачъёслэн выль схемаоссы но вылтусъёссы:

Шырмачъёс адямиосты пӧяло, «Почта России» яке мукет почта службаосысь ужасьёс луо шуыса тодматско.

Трубкадэс соку ик ӧд ке куштэ, йыружчи вералоз, адямилы кунгож сьӧрысь ыстэт вуиз шуыса, кудӥз понна вузэскерет люкам коньдон (таможенной сбор) тыроно. Та учыре тросэз адямиос верало, нокыӵе ыстэт ӧз заказтэ но номыре уг возьмало шуыса. Соку шырмачъёс иворто, посылказэс берен лэзён но вузэскерет люкам коньдон тыронтэм понна кулэ луоз СМС-иворысь лыдпусэн кодэз вераны, кудӥз вуоз адямилэн телефоназ.

Телефонэ СМС пыр вуэ зэмос луэмез эскерон код. Та лыдпусэн код шырмачъёслы кулэ адямилэн аслаз онлайн-банкинг кабинетаз яке Госуслуги порталэ но мукет тодмо вотэсбамъёсаз пырон понна, кудаз адямилэн даннойёсыз возисько.

Таӵе кибер йыртэманъёслэсь утиськон понна сакгес кариськоно: ноку но нокинлы но эн вералэ асьтэлэсь даннойёстэс – телефон пыр но, мерлыко вотэс пыр но, мессенджеръёс пыр но.

Кун ёзэтъёслэн, «Почта России» но мукет ужъюртъёслэн огмуртъёссы ноку но уз куре логинъёсты, парольёсты, СМС пыр вуэм зэмос луэмез эскерон кодъёсты.

Шырмачъёслэн выль схемаоссы но вылтусъёссы:

Шырмачъёс адямиосты пӧяло, Федерал выт бичанъя службаысь ужасьёс луыса тодматско. Соос телефон пыр адямиослы верало, выт тырон понна лыдӟымтэ табышез адӟо шуыса но лэзем ужкагаз пыр эскерон ортчытыны куро.

Адями со ужкагазэз уг шедьты. Шырмач «валэктэ», Госуслуги порталын рассинхронизация кылдэм шуыса, югдурез тупатон понна кулэ луоз СМС пыр вуэм зэмос луэмез эскерон кодэз вераны. Та ивортодэтэн йыружчиос Госуслуги порталын адямилэн аслаз вотэсбамаз шугъяськытэк пырыны быгато.

Индылэтъёс:

Кызьы астэ манипуляцилэсь утьыны:

Шырмачъёслэн ужан схемазы котьку огкадь: адямиосты пӧяса, ас кабинетсылэсь, Госуслуги порталлэсь но пӧртэм кулэ луись вотэсбамъёсысь даннойёсты вераны косо. Юнгес оскытон понна, йыружчиос туннэ нунал понна кысык луись юанъёсты ӝуто.

Шырмачъёс пӧртэм мерлыко службаосысь ужасьёс, эмчиос луо шуыса тодматскозы. Соос пӧялозы тӥледыз, лотереяын вормиды яке пенсиды будӥз, кунлэсь табыш вуиз яке пайдалыко кредит басьтэмды луэ шуыса. Та выллем амалъёс пыр даннойёсты талан мерлыко инженерия нимаське! Сак луэлэ телефон жингыртэмъёсын, со шырмачъёс луыны быгато. Эн дыртэ. Уд оскиське ке, вераськондэс дудытэ. Умой луоз, банке яке огазеяськонэ жингыртӥды ке со номеръя, кудӥз официальной вотэсбамын гожтэмын.

Чаклалэ герӟаськыны ӧтись амалъёсты. Герӟаськон понна шырмачъёс ӵемысь вотэс площадкаосты, мессенджерез ужазы куто. Зэмос удысэтъёслэн, тӧрлык ёзэтъёслэн огмуртъёссы ноку но WhatsApp яке Telegram пыр уз жингыртэ.

Ноку но нокинлы но эн вералэ асьтэлэсь даннойёстэс, СМС-кодъёсты, нимысьтыз юанлы валэктондэс но аккаунтъёстылэсь логинъёссэ но парольёссэ.

Сак учке номерез, кудӥныз аккаунт герӟаськемын.

Шуг парольёс малпалэ но ужады кутэ, дырын-дырын сое вошъялэ. Сервис луонлык сётэ ке, кык факторъем аутентификация лэсьтэлэ. Госуслуги портаын кыкетӥ фактор чотын луыны быгатэ СМС-код, одӥг пол кутӥськись ТОТР-код но биометрия.

Сак учке вотэсбамлэсь адрессэ, кудаз даннойёс пуктӥсько, мыдланьтэм вотэсбаме пыронлэсь утиське.

Госуслуги порталлэн одӥг гинэ луись шонер адресэз – gosuslugi.ru. Госуслуги умой утемын, шырмач аккаунтэз таланы быгатоз соку гинэ, куке адями ачиз вань кулэ луись ивортодэтэз вералоз солы. Порталын вань ваньмыз амалъёс, кудъёсыз юрттозы аккаунтэз утьыны. Ас даннойёстэс эскерыса но утьыса возе.

Индылэт:

Госуслуги порталын аккаунттэс «сӧризы» ке

1-тӥ вамыш: учётной записез берыктыны

1. Госуслуги порталын, банк яке эскерон-чаклан центрын паролез тупатэлэ.
2. Эскере, кабинетады асьтэлэн номерды но почтады гожтэмын яке ӧвӧл.

2-тӥ вамыш: аккаунттэс утелэ

Пырыку зэматонэз уже кутэ: нимысьтыз юан но мукет амалъёс аккаунттэс утён понна.

3-тӥ вамыш: эскере, кытын тӥляд учётной записьты уже кутӥськылӥз

1. Ас кабинетады пыре → Лушкемлык (Безопасность) → Сӧзнэтын ужъёс (Действия в системе). Эскере, учётной записяды кыӵе ке тодмотэм ужъёс ӧй вал-а лэсьтэмын. Вал ке, учётной запись Госуслуги порталын ужаз ке, юрттэт службае вазиське. Мукет вотэсбамын ке кутӥськиз – со вотэсбамлэн юрттэт службаяз.
2. Потэлэ ватсэтъёсысь, кудъёсаз тӥ ӧд пыралэ: ас кабинет → Лушкемлык (Безопасность) → Мобильной ватсэтъёс (Моб. приложения).
3. Тӥледын лэсьтымтэ лэзетъёсты берлань басьтэ: ас кабинет → Соглаш луонъёс но доверенностьёс (Согласия и доверенности) → Лэзетъёс (Разрешения).
4. Келям заявлениосты эскере. Со юрттоз шырмачъёслэсь йыруж малпанъёссэс шараяны.

4-тӥ вамыш: вазиськоно со огазеяськонэ, кудаз шырмачъёс вазиськизы вал тӥляд нимыныды

Тодӥськоды ке, кыӵе огазеяськонэ шырмачъёс вазиськизы, герӟаське ужасьёсынызы. Аккаунтады лушкемен пырыны быгатэмзы сярысь вералэ но ивортэлэ, нокыӵе заявлениос ӧд гожъялэ но нокыӵе ужъёс ӧд лэсьтылэ шуыса.

5-тӥ вамыш: Кунпуш ужъёсъя министерствое (МВД) заявление гожтэлэ

МВД-лэн ёзэтаз вазиськелэ. Аккаунтады лушкемен пырыны быгатэм сярысь ивортэлэ но вералэ ваньзэ, мае тодӥськоды со пумысь. Кылсярысь, юрттозы дыр, ку лушкемен пырыны быгатӥзы вал, яке мукет дайнноёс, кудъёсыз вотэсбамын пусъемын.

Индылэт:

Кызьы Госуслуги порталын учётной записез утьыны

Госуслуги порталэ пырон понна итэлэ ватсам амалъёсты

1. Ас кабинетады пыре → Лушкемлык (Безопасность) → Сӧзнэтэ пырон (Вход в систему).
2. «Вход с подтверждением» люкетын асьтэлы ӟечсэ амал быръе: СМС пыр зэматон, одӥг пол кутӥськись код яке биометрия.
3. «Контрольный вопрос» люкетын «ужась» амалэ выжелэ но юан пуктэлэ.
4. «Уведомления о входе» люкетын «ужась» амалэ выжелэ.

Кызьы ас кабинетад пыронэз зэматыны

Кызьы нимысьтыз юан пуктыны

Лумшкемлыкез ватсаса амалъёсын юнматон

• Одӥгпӧртэм логин но пароль ужады кутэлэ, кудъёсыз мукет вотэсбамъёсын уг кутӥсько.
• Нокинлы эн ивортэ нимысьтыз юанлы валэктондэс но СМС пыр вуэм кодъёсты, кудъёсыз gosuslugi но 0919 номерысь вуыло.
• Вотэсбамлэсь адрессэ сак учке. Госуслуги порталлэн одӥг гинэ луись шонер адресэз – gosuslugi.ru. Чаклалэ, адресын та выллем тупась гожтэмъёс медаз луэ: gossuslugi, gos.uslugi, gosuclugi но мукет.
• Тодмотэм ссылкаосы эн пыралэ. Госуслуги порталысь ссылкаос ас кабинетады, нимысьтыз утялтэтъёсы, удысэтъёслэн вотэсбамъёсазы вутто.
• Тодмотэм ыстӥсьлэсь файлъёссэ эн усьялэ! Госуслуги порталысь гожтэтъёс таӵе адресъёсысь вуыло:no-reply@gosuslugi.ru яке no-reply@pos.gosuslugi.ru
• Официальной ватсэтъёсты кӧчыртылэ. «Госуслуги» ватсэтэз  RuStore,GooglePlay, App Store но AppGallery приложениосысь кӧчыртыны луэ.