Дэбес ёросын куинь Спасъёслы сӥзем ужрад ортчиз. Празднике Дэбес ёросысь калык сяна, Глаз, Дэри, Эгра но мукет ёросъёсысь коллективъёс вуизы. Со сяна, Перм улосысь 100 туристъёс нимысьтыз та шулдыръяськонэз учкыны лыктӥзы.

Куноос понна ужазы пӧртэм пумо площадкаос. Люкаськем калык хороводэ пыриськиз. Выль октэм бакча сиёнъёсты, чечыез вӧсязы, выль изэм пызьлэсь пыжем сиёнэз веръязы.

Люкаськем калыкез праздникен ӟечкылазы Удмурт Элькунысь йӧскалык политикая министрлэн воштӥсез Л.Ю. Соковикова, «Дэбес ёрос» муниципал кылдытэт администрацилэн тӧроез А.Л. Глухов, Удмурт Элькунысь лулчеберетъя но туризмъя министрлэн воштӥсез П.П. Данилов, Ӟуч лулчеберетъя огазеяськонлэн кивалтӥсезлэн воштӥсез С.В. Щапова.

Та нуналэ «Играй, гармонь, на Сибирском тракте» элькун фестиваль-вожвылъяськон радъяськиз. Татчы пыриськизы элькунысьтымы но бускель улосъёсысь арганчиос но коллективъёс. Куноослэн верамзыя, праздник туж шулдыр, мыло-кыдо ортчиз.

Ужрадэз ортчытӥзы: Ӟуч лулчеберетъя Удмурт Элькунысь огазеяськон, Удмурт Элькунысь йӧскалык политикая министерство, Калыкъёслэн Эшъяськон юртсы.