Тулыслэн вуэмез шӧдӥське ни. 26-тӥ тулыспалэ Сюмси черкогуртын Вӧйдыр калык шулдыръяськон ортчиз. «Вӧйдыр матэктэ – мильым но узы-боры вае!» – туэ праздник таӵе концепциен герӟаськемын. Та огшоры гинэ ӧвӧл, малы ке шуоно Сюмси музъем Элькунысь пӧртэм турын-куаръёсын узыр. Татын будо: узы-боры, ягмульы, нюрмульы, кудымульы, лызмульы, шупу, палэзьпу, эмезъ, кудэмезь. Мильымез уго соос эшшо но ческытгес каро.

Та яркыт Вӧйдыр шулдыръяськонэ муниципал кылдытэтъёсысь 19 делегация пыриськиз. Лыктэм куноослы ӟечкылан кылъёсын вазиськизы: Сюмси ёросысь Администрацилэн Тӧроезлэн воштӥсез Александр Альматов, УЭ-ысь йӧскалык политикая министр Эдуард Петров, «Общество русской культуры УР» мерлык огазеяськонлэн Председателез Сергей Фефилов, УЭ-ысь Кун кенешлэн депутатъёсыз Андрей Ураськин но Александр Шаклеин.

«Дышем сямья туннэ ми кезьыт толэз келяськом но шуныт тулысэз пумитаськом. Котькуд ар таӵе ужрад пӧртэм ёросъёсын ортче. Таяз аре Вӧйдыр шулдыръяськонэз ортчытыны шуд усиз Сюмси ёрослы. Озьыен, ваньдэсты ӟечкыласько Кӧтӝож куштон арняен. Кӧсвозёнэз капчи мылкыдын кутскон понна, та нуналэ вань оскисьёс ог-огзэс простить каро», – вераз Эдуард Петров.

Ужрадын куноосыз возьмазы: вожвылъяськон площадкаос, узы-боры троеборье, вӧйдыр маскаръяськонъёс, эстафетаос, шудонъёс, гынсапеген хоккей, йӧлэсь лэсьтэм скульптураос. Ёросъёсысь пӧртэм коллективъёс кырӟанъёсын но эктонъёсын шулдыртӥзы. Мылкыд карисьёс пӧртэм ӵошатсконъёсы пыриськизы, такмакъёс кырӟазы, вӧйдыр сиён-юонъёсын куно каризы. Ужрадлэн пумаз Вӧйдыр сульдэрез ӝуатӥзы, кудӥз воштӥськонэз но вылдӥськонэз возьматэ.