22-тӥ гудырикошконэ Гракын «Лидер» лулчеберет юрт азьын трос калык калык люкаськемын вал. Угось татын Росси флаглэн нуналэзлы сӥзем бадӟым йӧскалыккуспо шулдыръяськон радъяськиз.

Мерлыко огазеяськонъёслэн ёзчиоссы пӧртэм пумо площадкаос радъязы: еврей егитъёслэн «Бейт Гилель» клубысьтызы пиналъёс квиллинг амалэн Давидлэсь кизилизэ тупатыны дышетӥзы, мылкыд карисьёслэн бам вылазы флаг суредазы; пор егитъёслэн «Ужара» мерлыко огазеяськонзылэн но удмурт егитъёслэн «Шунды» мерлыко огазеяськонзылэн ёзчиоссы утись пусъёс лэсьтыны дышетӥзы; «Иман» огазеяськонысь бигер егитъёс чак-чакк пӧранэн тодматӥзы; «Одлар Юрду» огазеяськонысь егитъёс «анай», «семья», «дор» кылъёсты азербайджан сямен вераны дышетӥзы; армян егитъёс асьсэлэн калыксылэн лулчеберетэнызы тодматӥзы; «Спас» огазеяськонысь азьветлӥсьёс ӟуч калык шудонъёслы но эктонъёслы дышетӥзы.

Пиналъёслы нимысьтыз «Российский флаг, ВИВАТ!» нимо квест радъямын вал. Нылъёс но пиос станциысь станцие бызьылӥзы, пӧртэм пумо ужъёс быдэсъязы.

Росси флаглы сӥзем концерт огазеяз пӧртэм калыкъёсты. Атыкай музъемез яратон но гажан, тупаса улон сярысь кырӟазы но веразы ӟуч, удмурт, пор, бигер, мордва, чуваш, армян, еврей но мукет кылъёсын. Та валтӥсь валатонъёс котькыӵе кылын валамонэсь.

Люкаськем калык «Вместе» ассоциациен ӵош шулдыръяськиз, эктиз-кырӟаз.

“Гракысь кельтӥмы ми асьмелэсь сюлэммес, – вера «Вместе» ассоциацилэн координаторез. – Ижкаре сьӧрамы басьтӥмы капчи мылкыд но ӟеч малпанъёс. Та нуналэ ми ӴОШ вал!”