Нунал огшоры гинэ быръемын ӧй вал – 25 тулыспалэ вуж календаря кылбурчилэн вордӥськем нуналэз (выль календаря – 9-тӥ южтолэзе). Та урам тодмо украин кылбурчилэсь, Тарас Шевченколэсь, нимзэ нуллэ 1937-тӥ арысен. Татчы синпельмет пул шуккыны ӵектиз украин лулчеберетъя «Громада» огазеяськон. Тодмостыны кулэ, юрттӥсь адямиос пӧлын украинъёс гинэ ӧй вал, мукет йӧслыко адямиос но мылкыд каризы пыриськыны ужрадэ. Шевченко урамын кемалась ӧвӧл ужбергатон ценрт усьтӥськиз, ужъюртлэн кузёез пумит ӧз луы мерлыко огазеяськонлэн азьвелисьёсызлэн ӵектоссылы.

Синпельмет пулэз усьтон ужрадэ трос калык люкаськиз: «Громада» огазеяськонлэн ёзчиосыз, Ижкар Администрациысь Лулчеберетъя кивалтоннилэн ӧнерчиосыз, 95-тӥ номеро хореографи лицейысь дышетӥсьёс но дышескисьёс. Ужрадэз кутскиз «Громада» огазеськонлэн кивалтӥсез Степан Михайлович Хаба. Люкаськем калыкез ӟечкылаз А.С. Ожмегов, Ижкарысь Ленин ёрослэн Тӧроез.

Ужрадэз азьланьтӥзы Тарас Шевченколэсь тодмо кылбуръёссэ лыдӟон, Громадалэн ёзчиосыз кырӟазы солэн кылъёсызъя гожтэм «Рэвэ та стогнэ Днипр широкий» кырӟанэз. Люкаськем калыкез ӟечкылазы Нижнекамск карысь украин огазеяськон но Украинаысь Педагогика тодосъя йӧскалык академи (Киев).

Украин лулчеберетъя огазеськонлэн ёзчиосыз оско, та ужрад юрттоз калык кусыпъёсты юнматыны но калыкъёслы ог-огзэс гажаны.

Громадалэн ёзчиосыз тау каро Ижкар Администарацилы, Лулчеберет но истори синпельметъёсты утёнъя комиссилы, ужъюртлэн кузёезлы А.П. Воробьевлы, 95-тӥ номеро лицейлы, ужрадэз радъянэ пыриськем вань адямиослы.

Синпельмет пулэз шуккон Шевченколы сиӥзем ужрадъёсты усьтӥз. Ижкарын орчозы Т. Шевченколэсь произведениоссэ лыдӟонъя вожвылъяськон, суредъёсын но офортъёсын возьматон, школаосын но библиотекаосын ортчозы Т.Шевченколы сӥзем урокъёс но ӝытъёс, радъяськозы концертъёс.