29-тӥ инвожое Татарстанысь Менделеевск ёросысь Тэремшур гуртын Гырон быдтон удмурт калык шулдыръяськон ортчиз. Татын со элькунлэн пӧртэм муниципалитетъёсаз, кытын удмуртъёс уло, 1998-тӥ арысен ортчытъяське.

Куноос сэбед ӝук веръязы. Калык киужъёсъя мастер-классъёсы пыриськыны но ярмаркаысен Удмуртиысь кибашлыослэн ужъёсынызы тодматскыны но асьсэлы маке со тунсыкозэ шедьтыны быгатӥзы. Семьялэн арез улсын «Шудо-буро семья» ӵошатскон ортчиз. Озьы ик куноос егитъёслэн «БиГерд» форумазы но чеберзэс но быгатонзэс возьматонъя «Чеберина но Батыр» вожвылъяськонэ пыриськизы.
Татарстанлэн Тӧроез Рустам Минниханов пусйиз, Татарстанын яркыт «Гырон Быдтон» огез тужгес но тодмо лулчеберетъя ужрад луиз ни шуыса. «Удмуртъёс – лякыт но ужась калык. Тӥ, огъя татарстан семьяын дано инты басьтыса, сюлмысь утиськоды асьтэлэсь кылдэс, сям-йылолъёстэс, элькунэз азинтон понна бадӟым уж нуиськоды. Ваньдэсты ӟечкыласько та шулдыр праздникен!»
Ӟечкылан кылъёссэ вераз Удмуртиысь Тӧролэн но Кивалтэтлэн Администрацизылэн кивалтӥсез Александр Журавлев но. Со куноослы Удмурт Элькун Тӧролэн Александр Бречаловлэн нимыныз вазиськиз.
«Туэ ми та праздникез тужгес но зол пусйиськом: Удмуртиын гинэ ум, Москваын «Россия» адӟытон-форумын но, Санкт-Петербургын но, куно карыны яратӥсь Татарстанын но. Шулдыръяськон огазея ваньзэс, кин яратэ аслэсьтыз музъемзэ, кин сюлмысь ужа, ӝӧк выламы котьку но няньмы, йӧлмы мед луоз шуыса. Туннэ ми тау кариськом вань ужась гурт калыклы, кудӥз кунмес сиён-юонлы ёрмонлэсь уте», – шуиз Александр Журавлёв.

Озьы ик со тау кариз Татарстанысь Удмуртъёслэн автономизылы удмурт калыклэсь лулчеберетсэ утемзы понна. Араз огазеяськон 130-лэсь трос ӵектосъёс улонэ пыӵатэ. Татын удмурт кылын школаос но нылпи садъёс ужало, творческой коллективъёс кылдыло. Али Татарстанын 21 сюрслэсь трос удмуртъёс уло.

Удмуртиын котькуд ар Сабантуй радъяське, школаосын но нылпи садъёсын бигер кылэз дышето, 30-лэсь ятыр мечетьёс усьтэмын.

Со сяна, Рустам Минниханов но Александр Журавлёв сям-йылолъёсты но калыклэсь лулчеберетсэ возьматӥсь гурт азбаръёсы пыразы. Одӥгаз удмурт сюан йылол ортчиз. Бызись ныл егитъёслэн «Шунды» огазеяськонэнызы кивалтэ. Александр но Виолетта йӧскалык дӥськутэн вал, ӵошен ву нуллӥзы но пу пильылӥзы.

Вуоно арын Гырон быдтон Татарстанысь Балтаси ёросын ортчоз.