17-18-тӥ тулыспалэ Татарстанысь Балтаси но Кукмор ёросъёсын удмурт лулчеберетлы сӥзем нуналъёс ортчизы.

Удмуртиысь пӧртэм удысъёсысь азьветлӥсьёс пыриськизы та ужрадэ. Соос пӧлын: Ф.А. Чибышева, Камсьӧр удмуртъёслэн огазеяськонзылэн кивалтӥсез, Н.В. Кондратьева, Удмурт кун университетысь удмурт кылосбуръя факультетлэн деканэз, О. Аркашева «Удмурт нылкышно кенеш» огазеяськонлэн ёзчиез, Ю.В. Кузнецов, «Удмуртия» книгапоттоннилэн кивалтӥсез, Элькунысь кун мунё театрысь актёръёс.

Пумиськонъёс ортчизы 6 школаосын. Делегацие пыриськись адямиос котькудӥз ужаз аслаз площадкаяз. Кылсярысь, одӥгаз площадкаын нылпи садъёсын ужасьёслы пумиськон радъямын вал, мукетаз – мерлыко огазеяськонъёсын ужез радъян сярысь вераськизы. «Удмуртия» книгапоттони тодматӥз выль книгаосын. Татарстанысь нылпиосты шумпоттӥз удмурт кылын мунё спектакль.

Огъя вераса, удмурт лулчеберетлы сӥзем нуналъёс туж пайдалыко ортчизы.

Ужрадэз ортчытон борды тыршизы: Удмурт Элькунысь йӧскалык политикая министерство, Калыкъёслэн эшъяськон юртсы, удмурт егитъёслэн «Шунды» мерлыко огазеяськонзы, вань удмуртъёслэн «Удмурт кенеш» ассоциацизы, Камсьӧр удмуртъёслэн йӧскалык центрзы.