4-тӥ оштолэзе Алнаш черкогуртын Ашальчи Окиез буре ваёнлы сӥзем «Ашальчи лыдӟонъёс» ужрад ортчиз. Лыдӟонъёсты радъязы Вань удмуртъёсэн «Удмурт Кенеш» ассоциацизы но «Удмурт нылкышно кенеш» огазеяськон Удмурт Элькунысь йӧскалык политикая министерстволэн но «Алнаш ёрос» муниципал кылдытэтлэн юрттэмзы улсын.

Ужрадэ элькунмылэн котькуд ёросъёсысьтыз делегациос вуизы. Соос пӧлын мерлыко огазеяськонъёслэн ёзчиоссы, Ашальчи Оки нимо премилэн лауреатъёсыз, тодосчиос. Ивор вӧлмытӥсь сӧзнэтъёс, шаерысьтымы тодмо адямиос. Туэ Ашальчи Оки нимо премиез басьтӥзы Якшур-Бӧдья ёросысь шаерчи Валентина Иванова но «Удмурт Кенеш» огазеяськонлэн Дэри ёросысь ёзэныз кивалтӥсь Лидия Биянова. «Та нылкышноос, кужымзэс жалятэк, пырисько мерлыко уже, трос лэсьто удмуртлыкез азинтон понна. Валентина Иванова «Удмурт Кенеш» огазеяськонлэн нырысетӥ кивалтӥсьёсыз пӧлы пыре, кема аръёссэ со кивалтӥз Якшур-Бӧдья ёросысь ёзэн, нош Лидия Бияновалэн кивалтэмез улсын Дэри ёросын уно ужпумъёс сэрттэмын -пертчемын ни», — вераз огазеяськонлэн азьветлӥсез Елена Александрова.