19-тӥ оштолэзе Калыкъёслэн Эшъяськон юртазы Гербер юмшанэз дасянъя комитетлэн кенешез ортчиз.

Кенеше люкаськемъёс вераськизы шулдыръяськонлэн воштэм дырез сярысь. Тодады вайытомы, туэ Герберез ортчытон нунал, 18-тӥ инвожо, тупа Тройча азьын кулэмъёсты бере ваён нуналэн, соин ик шулдыръяськонэз 25-тӥ инвожое ортчытыны малпамын. «Сюмси ёрос» муниципал кылдытэтлэн Тӧроезлэн воштӥсез Л.Е. Даровских верамъя, таӵе воштонъёслы калык пумит ӧз луы.

Озьы ик ӝутэмын вал юан площадкаослэсь нимзэ воштон сярысь. Азьвыл площадкалы ним сётэмын вал отын ортчись действия. Туэ Герберлэн валтись режисерез П.Поздеев чектэ соосты писпу нимъёсын герзаны. Угось шулдыръяськонлэн герзаськемын луоз удмуртъёслэн писпуосынызы – кызьпу, кыз но пужым. Гербер куинь этаплэсь сылоз: восяськон, шулдыръяськон, музъем ужасьёсты данъян. Сценаез но чебертыкузы но та концепциез уже кутозы.