Удмуртилэн шоркарез шуныт но мыло-кыдо пумита «Россиысь азербайджанецъёслэн федерал йӧскалык лулчеберетъя автономизы» («Федеральная национально-культурная автономия азербайджанцев России») мерлыко огазеяськонлэсь делегацизэ, улосвыл йӧскалык лулчеберетъя автономиослэсь но РФ-ысь мерлыко огазеяськонъёслэсь кивалтӥсьёссэс. Соос вуизы «Трос йӧскалыкъем Россия – Геройёслэн шаерзы!» ӵектосэз улонэ вӧлмытыны.

Котырес ӝӧк сьӧрын УЭ-ысь йӧскалык политикая министерствоын «Россиысь азербайджанецъёслэн федерал йӧскалык лулчеберетъя автономизы» мерлыко огазеяськонлэн президентэз Ханоглан Алиев ӵектосэз улонэ вӧлмытон сярысь вераз.

Калыкъёслэн Эшъяськон юртазы документъёс вылэ пыкиськыса лэсьтэм фильмез возьматӥзы, сӥземын со Удмуртилэн пӧртэм йӧскалыкъем геройёсызлы. Озьы ик усьтӥзы туспуктэмъёсын адӟытон, со кылдытэмын Удмуртиысь геройёслэсь, кудъёсыз нимысьтыз ожгар операциын асьсэдыз данлыко возьматӥзы.

Йӧскалык политикая министр залысь вань люкаськемъёсты ӟечкылаз но пусйиз, Удмурт Элькунлэн таӵе ужрадэ пыриськемез – туж бадӟым азинскон, малы ке шуоно ӵектос пӧртэм калыкъёсты огазеянлы, ас улосысьтыд Геройёсын тодматсконлы сӥземын шуыса. Элькунамы огкылысь но тупаса 130-лэсь трос калыкъёс уло.

«Трос йӧскалыкъем Россиия – Геройёслэн шаерзы!» ӵектослэн азьмугез – Россиысь пӧртэм калыкъёсты огазеян, ог-огдэ гажан но валан мылкыдэз ӝутон.