Ужрадэ кунгож сьӧрысь студентъёс но Элькунысь вылӥ дышетскон ужъюртъёсысь дышетӥсьёс пыриськизы.

Ӟечкылан кылъёсын вазиськиз Александр Филатов, УЭ-нысь Йӧскалык политикая министрлэн воштӥсез. Александр Владимирович пусйиз, элькунын улӥсь кунгожсьӧр муртъёслэн лыдзы паймытэ шуыса. Со вера: «Асьме ВУЗ-ъёсын дышетско пӧртэм шаеръёсысь адямиос: Пакистан, Индия, Узбекистан, Таджикистан, Туркменистан но трос мукетъёсыз. Шумпотымон, ми тӥледын тупаса ӵош ужаськом шуыса. Туннэ ӝыт пайдаё мед ортчоз, выль эшъёс мед шедьтоды».

Ужрад улсын вылӥ дышетскон ужъюртъёсысь огмуртъёс усто студентъёсты пусйизы. Грамотаен дышетскисьёс данъямын, кудъёсыз ВУЗ-ысь дышетскон, мер, творческой удысъёсын бадӟым вормонъёс басьтӥзы.

Ужрадлэн сиё-дано люкетэз бере студентъёсты группаослы люкизы. Котькудӥзлы интерактивной площадкаос дасямын вал: «танцы и игры народов России» мастер-класс, Калыкъёслэн эшъяськон юртын экскурсия но интеллектуальной шудон.

Ог 150 студентъёс но дышетӥсьёс ужрадэ пыриськизы. Котькуд ВУЗ творческой выступлениос дасязы, кудзэ сиё-дано люкетаз возьматӥзы. Кунгож сьӧрысь эшъёсмылэн йӧскалык кырӟанъёссы но эктонъёссы вань лыктэм куноосты шумпотыттӥзы.