Оглом 215 адями делегат вуиз, соос пӧлысь тужгес арлыдоезлы 87 арес, тужгес егитэзлы – 21 арес.

Съездлэн сиё-дано усьтоназ ӟечкылан кылъёсын вазиськизы лыктэм куноос. Удмурт Элькунысь Кивалтэтлэн Председателез Ярослав Семёнов пусйиз, Элькунысь Кивалтэт «Удмурт Кенеш» огазеяськонлэн кичӧлтонъёсызлы но ӵектосъёсызлы котьку но бадӟым саклык висъя шуыса.

«Историмес вунэтонтэм понна, асьмеос нимысьтыз пусйымон уж лэсьтӥмы, озьы мемориал пул вылэ Элькунысьтымы сиё-дано тодосчиослэсь, лулчеберетъя но устолыкъя усточиосэсь нимъёссэс пусйыса кельтӥмы. Кивалтэтлэн юрттэмезъя удмурт лулчеберетэз азинтонлы сӥзем яркыт фестивальёс ортчо», – вераз Кивалтэтлэн Председателез.

«Удмурт Кенеш» огазеяськон ужа УЭ-ысь Йӧскалык политикая министерствоен ӵош, мерлык огазеяськонлэн тросэз ӵектосъёсыз ведомстволэн юрттэмезъя радъясько. Йӧскалык политикая министр Эдуард Петров пусъе, та огазеяськон 30 арлэсь кемагес ужа ни, солэн данэз финн-угор калыкъёс пӧлын бадӟым луэ. «Кенеше пыриськисьёс элькунысь трос ӵектосъёсты радъяло. Кенешлэн кичӧлтэмезъя кылдэмын таӵе огазеяськонъёс: «Куара», «Артэ», «Шунды». Шумпотӥсько, трос аръёс ӵоже «Удмурт Кенеш» но Йӧскалык политикая министерство одӥг бадӟым командаен ужало шуыса», – пусъе йӧскалык политикая министр Эдуард Петров.

Берло куать арзэ огазеяськонэн кивалтӥз Татьяна Ишматова. Татьяна Витальевна аслаз докладаз пусъе, котькуд ёросын удмурт кылын ужрадъёс ортчо, бадӟым саклык висъяське анай кылэз дышетонлы. Но пуктэм ужпумъёсты быдэстон понна дышетӥсьёс но лулчеберетъя ужасьёс гинэ ӧвӧл, мукет удысъёсысь усточиос но сюлмогес пыриськыны кулэ.

«Удмурт Кенеш»-лэн ёросъёсысь но улосвылъёсысь кивалтӥсьёссы ивортӥзы, кызьы огазеяськон ужа Балезино, Вавож, Вотка ёросъёсын но Татарстан Элькунын.

Озьы ик та ӧтчамын Александр Аркадьевич Прохоров, гурт возёсъя азьвыл министр, Трокай Борисов нимо йӧскалык премиен пусъемын.

Ассоциацилэн данъян книгаяз пыртэмын таӵе нимъёс: Воткакар, Ува, Грах ёзэтъёсысь кивалтӥсьёс Алевтина Перевощикова, Валентина Комиссарова но Александр Аблаев, озьы ик «Питыран» театрез кылдытӥсь Надежда Касаткина но Татарстанысь удмуртъёслэн йӧскалык-лулчеберетъя автономизылэн кивалтӥсез Андрей Герасимов.

Куара сётон амалэн огазеяськонлэн уставаз воштӥськонъёс пыртэмын, озьы ик делегатъёс выль кивалтӥсь бырйизы. Со луиз Андрей Иванович Ураськин, Удмурт Элькунысь лулчеберетъя, туризмъя но йӧскалык политикая Кун Кенешлэн ялан ужась комиссиезлэн Председателез, кудӥз ини ог 15 ар Удмуртиысь Йӧскалык театрлэн кивалтӥсез луэ.