Люкаськем калыклы пумитан кылэн вазиськизы Удмурт Элькунысь йӧскалык политикая министр Лариса Буранова, Калыкъёслэн Эшъяськон юртсылэн кивалтӥсез Татьяна Боталова, Удмуртиысь калыкъёслэн ассамблеязылэн кенешезлэн тӧроез, Россиысь антропологъёслэн но этнологъёслэн ассоциацизылэн Президентэз, истори тодосъёсъя доктор, профессор Алексей Загребин.

Семинар радъяське ини куинетӥзэ. Татчы тодон-валан басьтыны но асьсэлэсь быгатонъёссэс возьматыны люкаськизы бускель улосъёсысь, Мордовиысь, Пермысь, ӧнерчиос. Озьы ик ужрадэ пыриськизы Камчатка улосысь куноос.

Нырысетӥ нуналэ сэрттӥзы-пертчизы Ванёсъя шоръюртлэн ужезлэсь пуштроссэ. Ужрад пайдаё мед ортчоз шуыса, семинарлэн модераторез Борис Островский, Кивалтонния Мускоысь «Сколково» школалэн ӵектосъёсын ужанъя кивалтӥсез, куинь группаослы люкиськыны ӵектӥз. Озьыен, нырысетӥ группа шоръюртлэн ужезлэсь пуштроссэ лулчеберет пыр эскериз, кыкетӥез – пӧртэм калыкъёслэсь куспъёссэс эскерон пыр, куинетӥез – йӧскалык политика удысысь туала примеръёсты, амалъёсты эскериз. Бӧрысь котькуд группа возьматӥз аслэсьтыз ужзэ, йылпумъянъёссэ. Ваньзэсты кылзэм бере, Борись Островский семинаре пыриськисьёс азе выль ужпум пуктӥз – шоръюртлэсь валтӥсь ужпумзэ шедьтоно, валэктоно кызьы со ужпум юрттоз йӧскалык политика удысэз ӟечомытыны .

Кыкетӥ нуналэ шоръюртлэсь сӧзнэтсэ эскеризы . Группаос одӥг валанэ вуизы – ванёсъя шоръюрт – со ивортодэт база, «тунсыко малпанъёсын банк». Озьыен та ужъюрт выроз мониторинг лэсьтонэн, йӧскалык политика удысын кылдэм юанъёсты эскеронэн, выль чӵектосъёс кылдытъянэн, азинлыко ӵектосъёсты азьланьтонэн, ӵош ужан эшъёс утчанэн но соосын кусып возёнэн, ивортодэт вӧлмытонэн, анай кылэз утёнэн, кунмуртъёслэсь асьсэлэн калыкенызы герӟаськем кулэяськонзэс быдэстонэн.

Удмурт Элькунысь йӧскалык политикая министерстволэн кивалтэтэзлэн малпамезъя, таӵе шоръюрт пайдалыко луоз кызьы ке элькунысьтымы мерлыко огазеяськонъёслы, озьы Приволжской федерал округысь улосъёслы, угось бускель улосъёс тунсыкъясько элькунамылэн йӧскалык политика удысын быгатонъёсыныз, тодон-валанъёсыныз, ӵектосъёсыныз. Элькунысьтымы Калыкъёслэн Эшъяськон юртсы луыны быгатэ база, кудаз люкаськозы азинлыко ӵектосъёс.