12-тӥ тулыспалэ Калыкъёслэн Эшъяськон юртазы Кун Думалэн йӧскалык ужпумъёсъя комитетэзлэн «Реализация Стратегии государственной национальной политики Российской Федерации на период до 2025 года в субъектах Российской Федерации на примере Удмуртской Республики» темалы сӥзем совещаниез радъяськиз.ӟ

«Элькунмылэн кивалтэтаз котькуно но вал йӧскалык политикая министерство. Котьку та юанэз син шорамы возиськомы. Сотэк уг луы. Соин но, дыр, туннэ нуналэ улосамы ог-огенызы тупаса уло пӧртэм выжысь калыкъёс. 2008-тӥ арын улосчиосмылы ӧссэ усьтӥз Калыкъёслэн Эшъяськон юртсы. Та нуналэ татын 35 мерлыко огазеяськонъёс интыяськемын. Таӵе юртъёс муниципал кылдытэтъёсын но усьтыны ӵектимы. Куать ёросъёсын соос ужало ини. Та вера калыклэсь тупаса но эшъяськыса улыны мылкыдзэ. Та шонер. Асьмеос ог огмес валаны но кылыны кулэ. Котькуд калыклэн аслаз шуг-секытъёсыз. Ми ваньмы ӵош люкаськиськомы но тыршиськом соосты палэнтыны», – вераз Удмурт Элькунлэн Тӧроез А.В. Соловьёв.

Кун Думаысь йӧскалык ужпумъёсъя комитетлэн кивалтӥсез Гаджимет Сафаралиев Удмурт Элькунлэн Россия Федерацилэсь йӧскалык политикая стратегизэ быдэстэмезлы вылӥ дунъет сётӥз: «Удмуртиез мукет улосъёслы примере пуктыны луоно. Татын стратегиен чаклам ужъёс бумагаын ӧвӧл, улонын быдэстӥсько. Адӟиське вертикаль: уж мынэ муниципал кылдытэтъёсын, мерлыко огазеяськонъёсын».

Удмурт Элькунысь йӧскалык политикая министр Л.Н. Буранова вазиськиз элькунамы Россиысь ичи лыдъем выжы калыкъёслэсь фестивальзэс ортчытыны: «Россилэн уйпалаз улӥсь ичи лыдъем выжы калыкъёс сяна, фестивале пыриськыны луонлыксы мед луоз Россилэн шор улосъёсаз (9 улос) улӥсь калыкъёслэн но. Дагестанын сыӵе калыкъёс туж трос. Та ужрад умой инты луоз калыкъёслы ог-огненызы тодматскыны, кенешыны, лэчыт юанъёсты эскерыны».