14-тӥ толшоре «О положении в республике» арлы быдэ докладаз Удмурт Элькунлэн Тӧроез Александр Бречалов ивортӥз, улосын ӟеч йӧскалыккуспо но вӧсьбуркуспо инъет кылдӥз шуыса. Юанлы валэктон сётӥсьёс 85%-эз озьы малпало.

Бадӟым саклык висъяз проектъёсын ужанлы. Йӧскалык политика удысын ӵектосъёсты улонэ вӧлмытон понна 2024-тӥ аре 50 миллион манетлэсь трос грант уксё утэмын. 10 миллион манетэз соос пӧлысь – йӧскалык-лулчеберетъя огазеяськонъёслэн ӵектосъёссылы.

Александр Бречалов саклык висъяз семьяос понна кылдытэм центрлы, кудӥз Калыкъёслэн эшъяськон юртазы ужа. Со центрлы юрттэ этноволонтёръёслэн регионкуспо корпуссы. 2024-тӥ аре отын 200 мурт дышетскиз. Табере та лыдпусэз 350-озь вуттоно.

Александр Бречалов ватсаз, 2025-тӥ аре кылъя кун программез быдэстон улсын улос коньдэтысь уксё висъялозы анай кылъя кабинетъёсты техникаен тырмытонлы. Таӵе уж лэсьтэмын ни Шаркан, Алнаш, Вавож, Дэри но Пичи Пурга ёросъёсын. Озьы ик Сберен тупанкыл гожтэмын – GigaChat нейросеть удмурт кыллы дышетскыны кутскоз, со понна Яндекс-берыктон понна 100 сюрс удмурт-ӟуч предложениос дасямын ини.

Докладын пусъемын, 2025-тӥ аре «Гербер» (0+) валтӥсь удмурт шулдыръяськон 21-тӥ инвожое Якшур-Бӧдья ёросысь Кекоран черкогурт вӧзын ортчоз шуыса. Нош Москваын со пӧсьтолэзе радъяськоз.

Йылпумъяназ Александр Бречалов вераз, Сарапулысь Покровской черк бордысь Петр но Павел гырлыжугонниез тупатон ужъёс азьлантӥсько шуыса. Со вань мыло-кыдоослы юрттӥськыны ӵектӥз, сыӵе луонлык вань Ӟуч Православной Черклэн Сарапулысь Епархиезлэн вотэсбамез пыр.

Тодэ вайытом, 7-тӥ толшоре уйин нырысетӥ Божественной литургия ортчиз Воткакарысь выльдэм Благовещенской соборын, соку отын Пётр Ильич Чайковскиез вӧсязы но буре ваизы.