18-тӥ оштолэзе Александр Бречалов Калыкъёслэн Эшъяськон юртазы мерлыко огазеяськонъёслэн азьветлӥсьёсынызы пумиськылӥз. Элькунмылэн Тӧроез нырысь тау кариз люкаськемъёслы 18-тӥ южтолэзе ортчем быръёнъёсы мыло-кыдо пыриськемзы понна. Улосамы быръёнъёс вань куронъёсты чакласа радъямын вал, кат тӥян учыръёс пусъемын ӧй вал.

Озьы ик Александр Бречалов люкаськемъёсты ӧтиз удмурт парламентлэн паськытатэм заседанияз, кудзэ вуоно арняе ортчытыны чакламын. Отын Тӧро Кивалтэтлэн кылем арын ужезлы йылпумъянъёс лэсьтоз. «Тӥ ваньды тодӥськоды на, Удмуртиын ужанме мон кутски тӥледын пумиськонысен, – пусйиз Александр Бречалов, – угось йӧскалык кусыпъёс котьку но вал но луозы нырысетӥ интыын. Котькыӵе югдуръёсы йӧскалык кусыпъёс удысын ченгешонъёслэсь палэтӥськыны кулэ асьмеос. Асьмелэн огъя ужпуммы – элькунысьтымы калыкъёслэсь тупаса улонзэс утён. Асьмеос ӵошен азинтыны кулэ ужез, кудӥз вылӥ ӟечлыкен радъямын тӥледын, элькунмылэн азьвыл кивалтӥсьёсыныз, Йӧскалык политикая министерствоен».

Армянъёслэн «Урарту» мерлыко огазеяськонзылэн кивалтӥсьсы Мнацакан Аракелян вераз мерлыко огазеяськонъёслэн йӧскалыккуспо ӵектосъёссы сярысь. Кылсярысь, еврейёслэн мерлыко огазеяськонзы школаын дышетскисьёс понна «Калыклэн геройёсыз – шаерлэн геройёсыз» эссэя вожвылъяськон радъяз. Конкурсын вормисе потӥз Ижкарысь 46-тӥ школаын дышетскись Ксения Вахрушева. Аслэсьтыз ужзэ нылыш сӥзем песянаезлы, кудӥз 14 аресаз Ижевск-Балезино чугун сюрес лэсьтоныны ужам. Александр Бречалов та вожвылъяськонлэсь форматсэ паськытатны ӵектӥз.

Пумиськонын эскеремын вал туж кулэ луись юанъёс, кудъёсыз герӟаськемын Удмуртиысь йӧскалык кусыпъёсын.

Элькунысьтымы поръёслэн автономизылэн кивалтӥсез Анатолий Радыгин Тӧролы вераз Каракулино ёросын Усть-Сакла гуртын нылпи садлэн кулэлыкез сярысь. Александр Бречалов кыл сётӥз югдурез пыр-поч эскерыны. Элькунмылэн Тӧроез тодэ вайытӥз, мерлык удысысь вань юанъёс Удмуртилэн командаезлэн повесткаяз кылё шуыса. «Сюресъёс лэсьтоно, гуртлы юрттоно, нылпи садъёс но школаос пуктоно. Ваньмыз бордын ужаломы!», – оскытӥз Тӧро.