2-тӥ оштолэзе Калыкъёслэн эшъяськон юртазы Россиысь но Белорусиысь калыкъёслэн огазеськонзылы сӥзем сӥё-дано ужрад ортчиз. Ватсаны кулэ, Россиысь но Белоруссиысь калыкъёслэн огазеяськон нуналзы 1996-тӥ арысен пусйиське. Ӵапак соку та кунъёс эшъяськон сярысь огкыл гожтӥзы вал.

Ужрадэ пыриськизы Удмуртиысь Тӧролэн но Кивалтэтлэн Администрацизылэн кивалтӥсез Александр Журавлев, Ижкарлэн тӧроез Дмитрий Чистяков, Удмурт Элькунысь Кун Кенешлэн Тӧроезлэн воштӥсез Татьяна Ишматова, йӧскалык политикая министр Эдуард Петров, Вань удмуртъёслэн «Удмурт Кенеш» огазеяськонзылэн кивалтӥсез Андрей Ураськин, Удмуртиысь «Батьковщина» белорус лулчеберетъя огазеяськонлэн кивалтӥсез Николай Украинец, озьы ик йӧскалык-лулчеберетъя огазеяськонъёслэн огмуртъёссы но карысь дышетскисьёс.

«Белорус лулчеберетъя огазеяськон Удмуртиын 20 арлэсь кема ни тырше-ужа. Татын тӥ одӥг шаерын вордскем муртъёстылы анай кылдэс но лулчебереттэс дышетыны юрттӥськоды. Озьыен, кык нылпи садын белорус группаос кылдытэмын, йӧскалык шулдыръяськонъёс пусйисько, Удмуптиысь мукет калыкъёсын ваче ужаськоды. Тау шуисько мыло-кыдо азьветлӥсьёслы бадӟым уж нуэмды понна, огазеяськонлэн кивалтӥсезлы Николай Дмитриевич Украинецлы», – пусйиз Александр Журавлев.

Эдуард Петровлэн верамезъя, УЭ-ын Белорус лулчеберетъя нуналъёс (6+), «О мужестве! О славе! О Победе» (6+) арды быдэ ортчись крезьгур фестиваль радъясько. Отчы трос гинэ калык люкаське. Огазеяськонлэн юрттэменыз М.Т. Калашников нимо университетысь дышетскисьёс Калыккуспо капчиатлет бызьылонэ пырисько, кудӥз сӥземын Быдӟым Атыкай ожын Быдӟым Вормонлы. 2025-тӥ арын бызьылон «Брест – Минск – Нижний Новгород – Ижевск – Минск» маршруттӥ ортчытэмын луоз.

Озьы ик ужрадын кырӟаны-эктыны быгатэмзэс возьматӥзы Ижкарысысь крезьгуръя колледжысь студентъёс но дышетӥсьёс, Устолыкъёсъя кыкетӥ номеро нылпи школаысь, укмысон витетӥ номеро нылпи садысь огазеяськонъёс. Эшшо на калыкез шулдыртӥзы «Айкай» калык кырӟанъя но эктонъя кун театрысь артистъёс, кудъёсыз Белоруссие гастрольёсын ӵем гинэ поталлямын.

Со сяна, та нуналэ Россиысь Азьмуртмылэсь но семьяезлэсь Совето Союз вакытысь коньдон сётэмын белорус мер ӧнерчилы, паралимпиецлы Алексей Талайлы – Москваысь Поглонной гурезе синпелет кылдытонлы. Со усьтэмын луоз Быдӟым Вормонлэн 80 ар тырмоназ.

Кун Тӧролэн нимыныз коньдонэз Россимылэн Азьмуртэзлэн пресс-секретарез – Россиысь Администрациезлэн Кивалтӥсезлэн воштӥсез Дмитрий Песков сётӥз.

Та ӵектос улсын Белоруссиысь но Россиысь семьяос, кудъёсаз Совето Союз вакытысь коньдон возиськемын на, сёто со уксёез выльысь ӵыжатонлы – фашистъёслы пумит султӥсь ожмаськисьёслы сӥзем синпелетъёс кылдытыны. Кык нырысетӥосызлы коньдон сётэмын Беларусьлэн Азьмуртэзлэсь Александр Лукашенколэсь но солэн семьяезлэсь.

Элькунысьтымы улӥсьёслэн та ужрадэ пыриськемзы лулчеберетэз утёнлы но азинтонлы юрттэ, со «Семья» йӧскалык ӵектослэн азьмугъёсызлы тупа.