Йӧскалык театрысь актёръёс «Ограбление по-удмуртски» полнометражной фильм пуктӥзы. Сюжетэзъя гуртын улӥсьёс: пудо возьмась, комбайнёр но ужлы ёрмись – банкез грабить карыны малпало. Пӧрме озьы, малпам ужзэс соостэк кутскиллям ни шуыса.

«Та фильм мерлыко ужпумъёс сярысь – адями, шуг-секыт югдуре сюре ке, алама сярысь малпаськыны кутске. Та сярысь ик милям киномы. Коньдон поттон пумысен ченгешись геройёс банкез ограбить карыны малпало. Ваньмыз умой пӧрме: соос йыруже ӧз ке но пырелэ, коньдон ки улазы сюре», – ивортӥз Вадим Дмитриев. Фильмез пуктӥзы Ижкарын, Пичи Пурга но Дэри ёросъёсын.

«Кинолэн черновой вариантэз вань ини, удмурт но ӟуч кылын озвучка каромы на. Собере элькунысь кинотеатръёсын возьматэммы потэ», – вераз на артист. Удмурт Элькунысь лулчеберетъя министр Владимир Соловьев пусйиз, муниципал кинотеатръёс но та киноез возьматыны быгатозы шуыса.

Удмуртилэн Тӧроез Александр Бречалов тау кылъёс вераз Йӧскалык театрысь артистъёслы – удмурт лулчеберетэз азинтэмзы но краудфандинг площадкаез уже кутыны быгатэмзы понна. «Тӥ ӵектосэз краудфандинг площадкаын ӝутӥськоды но озьы уксё поттыны быгатӥськоды ке, тӥляд ужды туж кулэлыко. Мон шумпотӥсько, куке командаослэн вань тунсыко малпанъёссы, кудъёссэ улонын вӧлмытон понна соос пӧртэм амалъёсты уже куто. Со туж умой», – вераз элькунлэн Тӧроез артистъёслы.

Вераны кулэ, кино бордын ужан дыръя краудфандинг амалэн коньдон люкан уж кӧня ке пол радъяськылӥз ни. Нырысетӥез юрттӥз тизер лэсьтыны, кыкетӥез – съёмкаос ортчытыны. Нош али бичам коньдон кинолы удмурт но ӟуч кылъёсын куара гожтыны мыноз.

24-тӥ южтолэзе Удмурт Элькунысь йӧскалык театрын концерт радъяськоз. Отысь поттэм уксё «Ограбление по-удмуртски» киноез пуктонлы кошкоз. Со сяна, ӵектослы таӵе платформаын юрттыны луэ Планета.ру

Удмурт Элькун Тӧролэн но Кивалтэтлэн нимлыко вотэсбамлэн ивортодэзъя.