Ортчем шутэтскон нуналъёсы быдэс элькунысь дышетӥсьёс муромытӥзы асьсэлэсь тодон-валанъёссэс «Родина – значит вместе» семинарын – йӧскалыккуспо герӟетъёсты но патриотизмо мылкыд пыӵатон удысъёсты эскеронъя ужрадын.

Семинар – УЭ-ысь Калыкъёслэн Эшъяськон юртсылэн но «Артэ» этнокультурной дышетон центрлэн ӵектоссылэн одӥгез люкетэз. «Артэ» пӧсьтолэзе утӥз грант, кудзэ сётӥз «Движение Первых» егитъёслэн но нылпиослэн Россиякуспо мерлык кун огазеяськонзы.

29-тӥ куарусёнысен 1-тӥ коньывуонозь «Ёлочка» егитъёслэн лагерязы дышетӥсьёс шудон амалъёсын но элькунысь этнос кусыпъёслэн аспӧртэмлыкъёсынызы тодматскизы. Соосын валче ужазы Удмурт кун университетысь историкъёс но кылосбурчиос, шудонлэн практикаезъя ӧнерчиос, ваньзы соос ужало огшоры шудонъёс но этнос кусыпъёсты юнматонъя шудонъёс кылдытон бордын.

Бератаз дышетӥсьёс калыкъёслэн эшъяськонзы сярысь 10 пӧртэм шудонъёслы концепциос лэсьтӥзы – ӝӧквыл, онлайн, дидактической, коммуникативной но визьбур шудонъёслы. Соос чакламын 12-18 аресъем нылпиослы. Шудонъёс пӧлын висъясько сыӵеосыз но, кудъёсыз пиналъёсты пӧртэм калыкъёслэн дӥськутэнызы но мифдуннеенызы тодмато, озьы ик регионмылэсь трос йӧскалыкъем историзэ возьмато.

Таӵе шудонъёс дышетӥсьёслы туж умой юрттэт сётозы этносъёс куспысь керетонъёсты быдтон удысын, Россиысь калыкъёслэсь историяя но лулчеберетъя ваньбур-узырлыксэс вӧлмытонын, озьы ик школаын урок но уроке пырисьтэм ужрадъёсты ортчытонын.

Та семинар ӵектослэн кутсконэз гинэ ай. Матысь дыре дышетӥсьёс борды школаосысь пиналъёс но итӥськозы. Пӧртэм удысъёсысь ӧнерчиос асьсэлэн кылдытэм шудонъёссы сярысь нылпиослы мадёзы но валэктозы, кызьы таӵеесь шудонъёсты лэсьтыны луэ. Россиысь калыкъёслэн огазеяськон Нуналазы элькунамы форум-шудон ортчоз, отчы пыриськисьёс – квест амалэн шудыса – трос йӧскалыкъем огъёзъёссы пӧлын асьсэлэсь ужъёссэс эскерозы но возьматозы.

Ӵектослэн йылпумъясь люкетэз – Удмурт Элькунысь школаослэн огазеяськонъёссы пӧлын шудон конструкторез эскерон но возьматон, отын «Разговоры о важном» нимо интерактив ужрадъёс ортчозы.

Егитъёслэн но нылпиослэн Россиякуспо мерлык кун огазеяськонзы кылдытэмын Россиысь Президентлэн Владимир Путинлэн пуктэтэзъя, учредительной собраниез 20-тӥ пӧсьтолэзе 2022-тӥ аре ортчиз.

Аслэсьтыз нимзэ «Движение Первых» куарасётон пыр басьтӥз егитъёслэн но нылпиослэн Россиякуспо мерлык кун огазеяськонзылэн I Съездаз, кудӥз ортчиз Москваын 18-20-тӥ толсуре. Быръемчиос озьы ик юнматӥзы ужлэсь 12 ӧрзэ но 11 огъя дунлыкъёссэ. Соос пӧлын: «Улон но сӥ-дан», «Патриотизм», «Ӟечлык но зэмбур», «Выльзэ кылдытыса ужан», «Юн семья» но мукет. Пыриськисьёсты огазеясь малпан: «Россиен ӵош луыны», «Адямилыко луыны», «Ӵош луыны», «Дугдылытэк азьлань мыныны», «Нырысетӥосыз пӧлын луыны».

Движенилэн ужез сӥземын: луонлык кылдытыны котькуд ласянь азинсконлы но асбыдэсмонлы, нылпиослы уж удысэз быръёнлы, озьы ик шутэтскон ортчытонлы.

Та движенилэн визылаз пырыны луэ 6 аресысен. Пыриськыны быгато быдэ вуымтэос, покчиёзо, шоръёзо, шоръёзо профессиональной но вылӥ дышетсконниосысь пиналъёс.