Удмурт Элькунысь йӧскалык политикая министерствоысь коллегилэн «Состояние работы по соблюдению требований к антитеррористической защищенности объектов (территорий) религиозных организаций в Удмуртской Республике» нимо кенешонэз ортчиз.

Кенешонэ пыриськизы МВД-ысь, Росгвардиысь, МЧС-ысь, УЭ-ысь терроризмлы пумит луонъя ӧриысь, кун тӧрлык но интыысь аскивалтэт ёзэтъёсысь, вӧсьбур огазеяськонъёсысь но Удмуртиысь йӧскалык-лулчеберетъя огазеяськонъёсысь огмуртъёс.

Та удысысь катрадлыкез выльдонъя, ӵош ужанъя, лулчеберет объектъёсты категориослы люкон ужлэсь пайдалыксэ ӝутонъя трос дэмланъёс но ӵектонъёс вуизы.

Тодэ вайытоно, категорирование улсы пыро черкъёс но мукет вӧсьбур объектъёс, кудъёсаз 50-лэсь трос адями тэре.

Удмурт Элькунын ог 340 вӧсьбур огазеяськонъёс ужало. Соос пӧлын 208 огазеяськонъёс Ӟуч Православной черклэн луо, 28 мусульман вӧсьбур огазеяськонъёс но 11 старообрядческой, лютеранской но мукет вӧсьбур огазеяськонъёс.

Коллегиын ӵектӥзы 2023-тӥ аре 3 квартал ӵоже трос калыкъем вӧсьбур объектъёсты эскеронэз йылпумъяны.

Оглом 2020-тӥ арысен ведомствоослэн комиссизы УЭ-ысь йӧскалык политикая министерствоен ӵош эскеризы 222 вӧсьбур огазеяськонъёслэсь черкъёссэс. Соос пӧлысь 188-эзлы пӧртэм инэтэн категориос сётӥзы. 2023-тӥ арын 100-лэсь трос таӵе интыосты пыр-поч эскероно на.