Грак ёросысь Пор Вожой гуртын нырысетӥез гужем йӧскалык шулдыръяськон ортчиз – «Семык» пор праздник. Удмуртиын улӥсьёс но куноос сое 28-тӥ ползэ пусйизы ни.
Пужыятэм ӵушкон – праздниклэн валтӥсь тодметэз, со куно пумитанлэн но эшлыко луонлэн пусэз луэ. Сям-йылолъёсын ӵушкон кузьым рад, утиськон но чеберман арбери, шобрет, праздниклэн символэз кадь кутӥське. Праздниклэн котькуд ужрадаз выжы писпу тема возьматэмын вал, со уката но зол чузъяськиз Россиысь Президентлэн Владимир Путинлэн та арез Семьялэн ареныз ялэменыз валче.

«Семык выллем ужрадъёс пыр ми егитъёсмес ортчемзэ тодазы возьыны, лулчеберетмес но сям-йылолъёсмес азинтыны дышетӥськомы. Та уж понна бадӟым тау кариськомы Пор автономилы, «Одо мари ушем» но «Ужара» огазеяськонъёслы. Татын ужало 9 муниципал центръёс, школаосын пор кылэз дышето, лыдӟетъюртъёсын пор кылын литератураез лыдӟо, творческой коллективъёс кылдыло. Со сяна, таӵе праздникъёс элькунын улӥсь 130-лэсь ятыр калыкъёсты огазеяло. Вуоно шутэтскон нуналъёсы, 15-тӥ инвожое, Шаркан ёросын удмурт Гербер шулдыръяськон ортчоз», – пусйиз Удмуртиысь Тӧролэн но Кивалтэтлэн Администрацизылэн кивалтӥсез Александр Журавлёв.
Удмурт Элькунысь поръёс доры куное Марий Элысь, Татарстанысь, Башкортостанысь но Киров улосысь делегациос лыктӥзы. Куноосты ӟечкылаз но пумитаз Удмурт Элькунысь йӧскалык политикая министр Эдуард Петров:

«Котькудмы асьмеос – огъя трос йӧскалыко Россиысь лулчеберетлэн но калык историлэн люкетэз. Таӵе ужрадъёсы пыриськон тодон-валанэз муромытэ, мукет лулчеберетъёсын, сям-йылолъёсын тодматэ, озьы ик пӧртэм йӧскалыкъёс куспын эшъяськонэз юнматэ но ог-огмез умойгес валаны но тупаса улыны юрттэ».

3 сюрслэсь трос адямиос туннэ пор калык лулчеберетэн тодматскизы, пор сиён-юонэз веръязы но пӧртэм площадкаосы пыриськизы. Вуоно арын Семык Кизнер ёросын ортчоз.