Удмурт Элькунысь йӧскалык политикая министерствоысь коллегилэн О результатах работы Министерства национальной политики Удмуртской Республики по профилактике экстремизма и конфликтов на национальной и религиозной почве» нимо кенешонэз ортчиз.

Кенешонэ пыриськизы йӧскалык политикая министр Эдуард Петров, министрлэн воштӥсез Александр Филатов, министерствоысь ужасьёс, Калыкъёслэн Эшъяськон юртсылэн директорез Юлия Шахтина, МВД-ысь, кун тӧрлык но интыысь аскивалтэт ёзэтъёсысь, вӧсьбур огазеяськонъёсысь но Удмуртиысь йӧскалык-лулчеберетъя огазеяськонъёсысь огмуртъёс.

Александр Филатов докладэн вераськиз. Со сӥземын УЭ-ысь йӧскалык политикая министерстволэн экстремизмлы пумит нюръяськонъя ӧрын бадӟым уж нуэмезлэн йылпумъянъёсызлы, калыкъёс но вӧсьбуръёс кусыпъёсын герӟаськем ужпумъёслы.

МВД-ысь Вадим Давков «О ситуации в сфере профилактики экстремизма  в Удмуртской Республике» нимо докладзэ мадиз.

Игорь Поздеев, УдмФИЦ УрО РАН-лэн историяя, кылъя но литературая Удмурт институтэзлэн кивалтӥсез, вераз Элькунысьтымы вылӥ дышетсконниосысь кунсьӧр дышетскисьёс пӧлын ортчытэм социологической эскеронлэсь йылпумъянъёссэ.

«Узбекский национальный центр социальной поддержки и развития культуры «Азия Плюс» Удмурт элькун мерлыко огазеяськонлэн кивалтӥсез Мухутдин Бахридинов йылпумъянъёсты лэсьтӥз Удмуртиын улӥсь узбекъёс пӧлын экстремизмлы пумит нюръяськонъя уж нуэмезлы.

Видеоконференцсвязь амалъя экстремизмлэсь но терроризмлэсь Кез ёросын утиськон сярысь вераз Людмила Дерендяева – «Кез ёрос» муниципал кылдытэтлэн Администрациысьтыз  Тӧролэн воштӥсез.

Туэ арын йӧскалык-лулчеберетъя огазеяськонъёслэн кивалтӥсьёсынызы 90-лэсь трос пумиськонъёс радъямын экстремизмлы пумит нюръяськонлы, калыкъёс но вӧсьбуръёс кусыпъёсын герӟаськем ужпумъёслы.

Йӧскалык политикая министр тау вераз Коллегие вань пыриськисьёслы. Пусйиз, валче ужаса Удмуртиын огкылысь но тупаса 130-лэсь трос калыкъёс но вань дуннеысь вӧсьбуръёс уло.