«Бадӟым этнографической диктант» калыккуспо акция 2022-тӥ арын 3-8-тӥ шуркынмонэ ортчоз. Та ужрад Йӧскалык ужъёсъя Федерал агенствоен но Удмурт Элькунысь йӧскалык политикая министерствоен сизьыметӥ ползэ радъяське ни. Каръёсын но ёросъёсын диктант гожтон понна нимысьтыз оффлайн площадкаос дасямын луозы, отын пыриськисьёсты пумитаны мылысь-кыдысь дасясько.

Лыдӟонъюртъёсын, мукет площадкаосын ӵошатыса, ужрад тужгес но ӵем ортчылэ. Библиотекаысь ужасьёс верало, пыриськисьёслэн лыдзы арысь-аре будэ шуыса. Пичи Пурга улонтӥкуспо лыдӟетъюртысь Людмила Шумихина библиотекарь ачиз но акцие сюлмысь пыриське. Со вера: «Котькуд ар юанъёс туж тунсыкоесь луо, котьку мар ке но выльзэ тодӥськод. Зэмзэ но, югдытон акция аслэсьтыз нимзэ быдэсак зэматэ».

Шаркан ёрос лыдӟетъюртысь Елена Ефимова шумпотэ, туэ диктант гожъясьёсын улэпкын пумиськоз шуыса. Библиотекарь вера: «Милям ёросын диктантэз гожтыны мылкыд карисьёс туж трос. Акция нуналэ соос ӝуась синъёсын ми доры вуо. Асьсэлэн ӝутскем мылкыдынызы артысь адямиосты, эшъёсэс но ужъюлтошъёссэс тырмыто».

Алнаш ёрос лыдӟетъюртысь библиографияя ӧнерчи Кристина Ганькова пусъе, заданиос секытэсь ӧвӧл шуыса: «Мукетъёсаз викторинаосын юанъёс ӵемысь секытэсь луо, ужрадэ выльысь пыриськон понна вань мылкыдэз быдто. Нош бадӟым этнографической диктантын мукет сямен – вуоно аре нош ик ужрадэ пыриськем потэ, асьсэлэсь балъёссэс умоятыны мылкыд карисьёс будо».

Онлайн формат диктантлэн нимысьтыз вотэсбамаз www.miretno.ru 3-8-тӥ шуркынмонэ усьтэмын луоз. Озьы ик пыр-почгес ивортодэт ВКонтакте https://vk.com/miretno вотэсбамын вань. Акцие пыриськисьёслы сертификатъёс дасялозы. Шонер валэктонъёс Бадӟым этнографической диктантлэн вотэсбамаз 11-тӥ шуркынмонозь понэмын луозы.

Тодэ вайытом, «Бадӟым этнографической диктант», яке этнодиктант, 2016-тӥ аре Удмурт Элькунын «вордӥськиз». Нырысьсэ акция 4-тӥ шуркынмонэ ортчиз, отчы Россиысь 90 сюрс адями пыриськиз.