УЭ-ысь Кун Кенешын элькун семинар-кенешон ортчиз, кудӥз 2025-тӥ арын ортчоно ужрадъёсты радъянлы сӥземын вал. Соос пӧлын: Удмуртилэн кунлык басьтэмезлы 105 ар, Кун Кенешлы 30 ар, Быдӟым Атыкай ожын Вормонлы 80 ар но Атыкай музъемез утисьлэн арез.

Ужрадлэн кичӧлтӥсез но радъясез луиз Удмурт Элькунысь Кун Кенешлэн Тӧроезлэн воштӥсез, тодосъя, дышетонъя но граждан мерлык институтэз азинтонлы юрттэт сётонъя ялан ужась комиссиезлэн председателез Татьяна Ишматова.

Семинар-кенешонэ пыриськизы кун тӧрлык ёзэсъёслэн, мер но дышетон юртъёслэн кивалтӥсьёссы, муниципал кылдытэтъёсысь огмуртъёс.

Йӧскалык политикая министр Эдуард Петров «Удмурт Элькунысь кун кылъёсты но Удмурт Элькунысь калыкъёслэсь мукет кылъёссэс утён, дышетон но азинтон сярысь» кун программалэсь улонэ вӧлмытонъя 2025-тӥ арлы пуктэм эсэпланъёс сярысь вераз.

«Тужгес но бадӟым ужпум луиз Удмурт Элькунысь кун кылъёсты но Удмурт Элькунысь калыкъёслэсь мукет кылъёссэс утён, дышетон но азинтон сярысь нимысьтыз кун программаез юнматон. Та программалэн инъетэз – нылпи садъёсын но школаосын анай кылэз утён», – вераз йӧскалык политикая министр Эдуард Петров. Со ватсаз на, 2025-тӥ арын кун программа улсын висъям коньдон мыноз егитъёслэн ӵектосъёссылы, удмурт кылын егитъёслы вотэс-каналъёсты азинтонлы, анай кылъя курсъёсты радъянлы, удмурт кылтодонъя книгаос поттонлы.