Удмурт егитъёслэн «Шунды» мерлыко огазеяськонзы «Арт-экспедиция» ӵектосэныз вуылӥз вить удмурт гуртъёсы. Та проект вормисе потӥз «Культурная мозаика малых городов и сел» ӵектосъёсъя Быдэсроссиысь вожвылъяськонын, кудзэ радъяз Елена но Геннадий Тимченкоослэн юрттэт сётонъя фондзы.

Быдэстӥськиз ӵектос 28-тӥ пӧсьтолэзьысен 7-тӥ гудырикошконозь. Та нуналъёсы егит суредаськысьёсыз, туспуктӥсьёсыз, фольклористъёсыз, артистъёсыз, крезьгурчиосыз, блогеръёсыз, но мерлыко вотэсысь азьветлӥсьёсыз шуныт пумитазы Александрово (Кез ёрос), Кабачигурт (Эгра ёрос), Кекоран но Сюровай (Якшур-Бӧдья ёрос), Улӥ- Посьтол (Пичи Пурга ёрос), Чем-Куюк (Алнаш ёрос) гуртъёсын.

Котькуд гуртын егитъёс 2 нунал ӵоже улӥзы-ужазы. Нырысетӥ нуналэ радъяськизы пӧртэм пумо мастер-классъёс (суредаськон, театр, спирит-арт, интернет-журналистика, чеберлыко киужъёс, дизайн). Нош гуртысь пересьёс, кибашлыос лыктэмъёсты дышетӥзы гынсапег лёгыны, ыжгон черсыны, калык сиёнъёсты пӧраны. Экскурсиосы ветлыса, гуртысь тунсыко адямиос сярысь видио дасяса, гуртлэн кылдэмез но азинтӥськемез сярысь веранъёсты кылзыса но гожтыса, фотоперепись ортчытыса егитъёс гуртлэсь мерлыко но лулчерет улонзэ эскеризы. Љыт гурт калыклы удмурт кино возьматӥзы, калык эктонъёсъя мастер-класс ортчытӥзы. Кыкетӥ нуналлэн ӝытэз ортычытэм ужъёслы йылпумъянъёс лэсьтонлы сӥземын вал. Лэсьтэм киужъёсын возьматон, мастер-классъёсын дасям номеръёсын концерт радъямын вал. Со сяна егит артистъёс гуртоослы шулдыр кырӟанъёссэс кузьмазы.

Озьыен, ёросъёсын уж йылпумъяськиз, но ӵектос бордын уж азьланьтӥське на. Экспедицие пыриськись егитъёс иныосын лэсьтэм видео но фото материалъёсты, гожъямъёссэс эскеро но радъяло.

Озьыен, ӵектос, кудӥз гуртысь лулчеберет улонэз бугырыны кулэ вал, пуктэм ужпумзэ быдэстӥз. Со сярысь лэсьтэм блогъёс, люкам фольклор материалъёс сяна гуртоослэн но ӵектосэ пыриськем егитъёслэн шудэн но шунпотонэн тырмем синъёссы верало.

Ужрадэз ортчытыны юрттӥзы: Удмурт Элькунысь йӧскалык политикая министерство, ёрос Администрациос, Калыкъёслэн эшъяськон юртсы

Ватсаса ивортодэт басьтыны луоз таӵе телефонъёсъя – 8 904 837 14 33, (3412) 63-10-44 (Тронина Ольга Алексеевна, ӵектослэн кивалтӥсез, «Шунды» мерлыко огазеяськонлэн кивалтӥсез).

Проектъя хэштегъёс #шунды #артэкспедиция #культурнаямозаика